តើអ្នកប្រាកដទេថា នឹងមិនចាប់អារម្មណ៍ និងសម្លឹងមើលស្រីស្អាតដោយមិនដាក់ភ្នែកនោះ?
លោក អរុណ និងកញ្ញា សួស្ដី
«មនុស្សប្រុសនៅពេលដែលបានជូនគេមកដល់មុខផ្ទះហើយ នៅឆ្លៀតឲ្យគេអោប ឬថើបលាគ្នាទៀត បើថ្ងៃស្អែកគង់តែបានជួបគ្នាដដែលនោះ…»
«មនុស្សប្រុសនៅពេលដែលបានឃើញមនុស្សស្រីស្លៀកខ្លី គឺតែងតែងាកមើលគេមិនដាក់ភ្នែកទាល់តែសោះ រហូតដល់គេថាឲ្យ មើលស្អី មិនដែលឃើញស្រីស្អាតទេ??? ឬដល់គេគេចចេញទៅបាត់ទើបអស់ចិត្ត… »
មនុស្សប្រុសគឺមានចរិតមួយ ដែលគួរឲ្យអាណិតផង គួរឲ្យស្រីៗស្អប់ផង នោះគឺជាចរិតមួយបើយើងប្រៀបធៀបទៅដូចសត្វកន្លង់អញ្ចឹង ហើរត្រឹប (ជញ្ជក់ក្រេប) កេសរផ្កាដូចឃ្មុំ ពីផ្កាមួយទៅផ្កាមួយដោយឥតសំចៃដៃ ត្បិតតែខ្លួនមានផ្កាមួយដែលជាទីស្រឡាញ់ហើយក៏ពិតមែន ក៏មិនអាចបោះបង់ចោលផ្កាទាំងឡាយជាច្រើនផ្សេងទៀតដែរ។
យ៉ាងដូចទៅនិងឧទាហរណ៍ខាងលើនេះហើយ ទើបមនុស្សប្រុសម្នាក់នៅពេលដែលមានដៃគូស្នេហ៍ហើយនោះ ក៏ជារើយៗនៅតែលួចសម្លឹងមើលមនុស្សស្រីដទៃទៀតដោយមិនដាក់ភ្នែកដដែល។ ចំណុចអាក្រក់នេះហើយ ដែលធ្វើឲ្យមនុស្សប្រុសមិនចេះស្កប់សម្រាប់មនុស្សប្រុស បីដូចសមុទ្រសាគរទន្លេបួនដប់ក៏នៅមិនស្កប់ដូច្នោះឯង។ ករណីនេះឯង ចំពោះមនុស្សស្រី ដែលប៉ិនប្រចណ្ឌនោះ មុខជាខឹងក្រេវក្រោធស្រែកឡូឡាដាក់ដៃគូ ឬប្តីរបស់ខ្លួនមិនខាននៅពេលដែលឃើញគាត់សម្លឹងស្រីៗទាំងដៃគូ នៅក្បែរដូចនេះ។ («ណែ៎! លោកប្តី! ខំប្រឹងសម្លឹងមើលអី? អីក៏មើលម្លេះ! ចាស់ហើយនៅចង់ស្រីទៀតមែន? … ») «មនុស្សប្រុសនេះណា៎ ឲ្យតែភ្លេចខ្លួនគឺដឹងតែលួចទៅខូចទៀតហើយ ពិតជាធ្វើឲ្យស្រ្តីៗ ដែលជាប្រពន្ទហត់នឿយណាស់ ព្រោះត្រូវនៅចាំតាមចាប់សហាយរាល់ថ្ងៃនោះអី!!»។
ប្រហែលជាមនុស្សស្រិជាច្រើនអាចគិតដូចខាងលើនេះ បើដូច្នោះមែនមនុស្សប្រុសទាំងអស់មុខជាត្រូវទូលនូវកំហុសនេះពុំខាន។ ប៉ុន្តែចំពោះបញ្ហានេះ យើងក៏មានការបកស្រាយមួយសម្រាប់បុរសដែរ ព្រោះថាមនុស្សប្រុសនៅពេលធ្វើការងារ ឬក៏ធ្វើអ្វីមួយ គឺអាច ឬក៏តែងតែអាច យកការងារជាច្រើនមកដាក់ក្នុងពេលតែមួយ។ ឧទាហរណ៍យ៉ាងធម្មតាមួយទៅចុះ មនុស្សប្រុសអាចធ្វើសកម្មភាពមួយចំនួនដូចជា ញ៉ាំអាហារពេលព្រឹកបណ្តើរអានកាសែតបណ្តើរ ហើយពេលខ្លះក៏បើកវិទ្យុចោលហើយក៏មើលទូរទស្សន៍ និងកាត់ក្រចកដៃធ្វើមិនដឹងក៏មានដែរ។ ដែលវាមានលក្ខណៈខុសពីមនុស្សស្រី បើដាំបាយធ្វើម្ហូបគឺដាំបាយធ្វើម្ហូប គឺកំរធ្វើសកម្មភាពអ្វីផ្សេងលើសពីនឹងខ្លាំងណាស់។ ដូច្នេះហើយ នៅពេល ដែលមនុស្សប្រុសកំពុងតែបណ្តើរដៃគូរបស់ខ្លួន ហើយមានមនុស្សស្រីផ្សេងទៅដើរកាត់ គាត់អាចនឹងសម្លឹងមើលគេមិនខាន ដោយសារតែជាទំលាប់ពីកំណើតរបស់មនុស្សប្រុស ដែលចូលចិត្តធ្វើសកម្មភាពច្រើនក្នុងពេលតែមួយ កំពុងតែដើរជាមួយនិងដៃគូក៏ពិតមែនក៏ឆ្លៀតមើលស្រីផ្សេងបន្តិចដែរ ប៉ុន្តែក្នុងន័យនេះ ក្នុងចិត្តរបស់គាត់មិនមែនចាត់ទុកស្រីផ្សេងស្អាតជាង ឬយកដៃគូរបស់ខ្លួនទៅប្រៀបធៀបនិងអ្នកដទៃនោះទេ ហើយក៏មិនមានអ្វីចាប់អារម្មណ៍ស្រឡាញ់ស្រីផ្សេងងាយៗនោះដែរ សូមកុំច្រលំ។ ក្នុងពេលនេះ ក្នុងនាមជាមនុស្សស្រី និងជាដៃគូរបស់គាត់ត្រូវយល់ និងជឿជាក់លើអ្នកដែលខ្លួនស្រលាញ់ទើបប្រសើរ។
ចំពោះមនុស្សស្រី ដែលអាចយល់ពីចំណុចនេះបានគឺមិនមែនជាការងាយស្រួលនោះឡើយ។ ចំពោះបុរស ដែលខិលខូចគឺចូលចិត្តមើលស្រីៗមិនដាក់ភ្នែកក្នុងន័យមួយផ្សេង អាចក្នុងផ្លូវមិនល្អ។ តែចំពោះបុរសល្អគឺយើងជាមនុស្សអាចទុកចិត្តគាត់បាន មិនឡើយសន្មត់ដោយផ្អែកលើគំនិត «ត្រីស្អុយមួយ គឺស្អុយមួយកន្រ្តក» យកមកសន្និដ្ឋានទាំងអស់នោះ ឲ្យតែមនុស្សប្រុសសុទ្ធតែអាក្រក់មិនអាចទុកចិត្តបានទាំងអស់នោះ។ ត្រូវចេះគិតពិចារណាឲ្យបានត្រឹមត្រូវផងមុននឹងសន្និដ្នាន ព្រោះអ្វីដែលបានរៀបរាប់ខាងលើជាចំណុចនៃមូលហេតុថាតើ «ហេតុអ្វីបានជាមនុស្សចូលចិត្តសម្លឹងមើលមនុស្សស្រីមិនដាក់ភ្នែកដូច្នេះ? »នឹងឯង ៕
