ហេតុអ្វីបានជានារីៗចូលចិត្តធ្វើឲ្យបុរសៗយើងអន្ទះសាដូច្នេះ?
នៅពេលកំពុងមានស្នេហា នារីៗភាគច្រើនចូលចិត្តលលេងជាមួយនិងមនុស្សប្រុសខ្លាំងណាស់ ។
ឧទាហរណ៍ដូចជាសន្ទនា និងស្ថានភាពដូចតទៅនេះ៖
«ណប់ចិត្ត! តោះយើងនាំគ្នាទៅជិះស្គីលេងម៉េចដែរអូន?» «ម្យ៉ាងដែរតើ ប៉ុន្តែចាំអូនគិតមើលសិន…» ។
ទៅដើរលេងនៅកន្លែង១តែ២នាក់ មិត្តប្រុសចង់ឆ្លៀតនៅកន្លែងគ្មានមនុស្សចង់ថើបមិត្តស្រីខ្លួន ក៏ប៉ុន្តែនាងប្រតិកម្មតបថា៖ «បងកុំចឹងអីមើល ប្រយ័ត្នគេឃើញខ្មាស់គេណា!» ។
នៅពេលដែលមនោសញ្ចេតនារបស់អ្នកទាំងពីរនាក់បានចូលដល់ដំណាក់កាលដ៏ជ្រាលជ្រៅទៅហើយនោះ ក៏សឹងតែថាជាគូស្នេហ៍១គូយ៉ាងស្និតស្នាលបំផុតផងនោះ នៅពេលខាងប្រុសចង់ហួសខ្សែបន្ទាត់ព្រំដែនជាងនេះបន្តិចទៀតចំពោះខាងស្រី ស្រាប់តែនាងធ្វើជាភ្ញាក់ផ្អើលរួចក៏បដិសេធភ្លាមថា៖ «ចាត់ទុកថាអូនអង្វរអូនចុះ … រឿងបែបនោះ ចាំយើងការហើយទៅ ណាចាំធ្វើវា…» ។
និយាយឲ្យខ្លីទៅ ខាងស្រីដឹងតែថា បដិសេធចោលទាំងអស់នូវអ្វីទាំងនេះគ្រប់យ៉ាងយ៉ាងស្អាតតែម្តង ។
នៅពេលដើរលេងជុំគ្នា ខាងស្រីតែងតែឈរនៅម្ខាងហើយ សម្លឹងទៅកាន់ខាងប្រុសទាំងស្នាមញញឹមដ៏ផ្អែមល្ហែម ដែលធ្វើឲ្យប្រុសៗនឹងគិតថានាងពិតជាមានបំណងចង់ឲ្យខ្លួនដើរទៅកាន់នាង ហើយថតរូបជាមួយគ្នាយ៉ាងស្និតស្នាល ប៉ុន្តែផ្ទុយមកវិញពុំមែនដូច្នោះឡើង នៅពេលខាងប្រុសហោះហើលសំដៅទៅកាន់ខាងស្រីយ៉ាងសប្បាយរីករាយ និងរំពឹងថានឹងបានកៀកកើយហើយនោះ ក៏បែរជាខាងស្រីរត់ចេញទៅឈរនៅម្ខាងទៀតទៅវិញ ហើយនៅតែឲ្យខាងប្រុសតាមទៅទៀត ។
«នាងធ្វើដូច្នេះ មិនមែនស្អប់ខ្ញុំនៅក្បែរនាងមែនទេ?» ។ មើលទៅវាពុំមែនដូន្នេះឡើង ព្រោះនាងនៅតែផ្តល់ស្នាមញញឹមដ៏ផ្អែមល្ហែមដល់ខាងប្រុសនោះដដែល ដូចនេះអាចសន្និដ្ឋានបានថាតែយ៉ាងដូច្នេះឯង គឺវាសារចុះឡើងច្រើនដងដដែលៗ ទើបអាចធ្វើឲ្យសុភាពបុរសយើងមានការអន្ទះសា ។
តើនារីៗយើងចូលចិត្តលលេងជាមួយនឹងបុរសៗយើងបែបនេះ ហើយធ្វើឲ្យខ្លួនឯងសប្បាយរីករាយណាស់ទៅឬ??
មានមនុស្សមួយចំនួនសន្និដ្ឋានថា ការធ្វើបែបរបស់មនុស្សស្រីអាចធ្វើឲ្យនាងរីករាយ និងទទួលបានអារម្មណ៍សប្បាយក្នុងចិត្តមួយយ៉ាងពិសេសនៅពេលដែលឃើញសុភាពបុរសយើងអន្ទះសាឆ្ការដៃឆ្ការជើង រកធ្វើអ្វីពុំទាន់ មកតាមយកចិត្តរបស់នាង ហើយវាជាចរិតចំណែកមួយប្រភេទដែលលាក់កំបាំងនៅក្នុងចិត្តរបស់នារីៗ ។ ប្រសិនបើយើងគិតតែម្ខាងថាចរិតចំណែកបែបនេះទៅលើផ្លូវ «អវិជ្ជមាន» វិញ នារីៗអាចនឹងទទួលរងនូវភាពអយុត្តិធម៌មិនខាន ។ ព្រោះថាមនុស្សស្រីកើតមកគឺប្រកបទៅដោយ សមត្ថភាពការពារខ្លួនពីកំណើត និងមានចរិតអៀនខ្មាស់ខ្លាំងផងដែរ ទើបធ្វើឲ្យករណីទាំងនេះ ក្លាយទៅជាប្រធានបទដែលធ្វើឲ្យសុភាពបុរសយើងអន្ទះសារកតែទប់ចិត្តពុំបានអញ្ចឹងឯង ។ មានតែដូច្នេះទេ ទើបជាការបកស្រាយមួយដ៏ល្អចំពោះចរិតបែបនេះរបស់មនុស្សស្រី ដែលជារើយៗអាចធ្វើឲ្យបុរសៗអន្ទះសាក្នុងចិត្ត ។
សេចក្តីស្នេហារវាងមនុស្សពីរនាក់ គឺដូចទៅនឹងការលេងជិះប៉ាកប៉ើកអញ្ចឹង របះរបើងងើបៗងក់ៗផ្ងាក់ផ្ងើក ម្ខាងស្រាលងើបឡើង រីឯម្ខាងធ្ងន់វិញស្រុតចុះ បីដូចជាចិត្តរបស់បុរសនារីក្នុងពេលកំពុងស្នេហាគ្នាអញ្ចឹងដែរ ម្ខាងដែលចង់ខ្លាំងនឹងមានចិត្តអន្ទះសារ រីឯម្ខាងទៀតដែលស្ងប់ល្អចិត្តនឹងធឹងនោះនឹងធ្វើឲ្យម្ខាងអន្ទះសានោះកាន់តែអន្ទះសាទៀត ។ វាជាចិត្តសាស្ត្រផ្គួបគ្នាមួយរវាងបុរសនិងនារីដែលកំពុងស្នេហាគ្នានោះឯង ។ ហើយភាគច្រើនផងដែរ គឺមនុស្សស្រីដែលយល់ជាង និងឈរនៅខាងដែលធ្វើឲ្យមនុស្សប្រុសកាន់តែមានចិត្តអន្ទះសានោះឯង។ ជួនកាលសុភាពបុរសយើងក៏ដឹង និងយល់អំពីរឿងនឹងដែរ ប៉ុន្តែដោយសារចំណង់ចាក់ស្រែះមិនដាច់ ហើយចរិតដូចកូនក្មេងចង់បានរបស់លេង ចង់តែបានដល់ដៃ ចង់តែសម្រេចបំណងខ្លួនភ្លាមៗ ដូច្នេះហើយក៏ត្រូវបានមើលរំលងទៅ ។
ម្យ៉ាងវិញទៀត នៅក្នុងសង្គមយើងបច្ចុប្បន្នមានទម្លាប់ដ៏ចាក់ស្រែះមួយទៅហើយ គឺជាទូទៅគឺបុរសៗតាមស្រលាញ់នារីៗ ដូច្នេះចំពោះនារីៗវាជាការមានប្រៀបរួចជាស្រេចទៅហើយ ។ នៅពេលដែលនារីៗទទួលយកនូវការសុំស្នេហ៍របស់បុរសហើយនោះ ពួកគាត់អាចនឹងឆ្លៀតក្នុងឱកាសនេះដើម្បីធ្វើឲ្យចិត្តរបស់បុរសៗកាន់តែមានភាពអន្ទះសាទៅទៀតនៅដំណាក់កាលបន្តបន្ទាប់គ្នានៃសេចក្តីស្នេហារបស់ពួកគាត់នោះ ។
នៅពេលដែលសុភាពបុរសៗយើងយល់ពីមូលហេតុ និងស្ថានភាពចិត្តសាស្ត្រទាំងនេះហើយ ទើបអាចជួយដល់យុទ្ធស្នេហារបស់ខ្លួនកុំឲ្យមានភាពស្មុះស្មាន និងហួសកម្រិតផង ។ ប៉ុន្តែបើមនុស្សប្រុសដែលប្រើប្រាស់នៅស្នាដៃថោកទាបចំពោះមនុស្សស្រី ដើម្បីតែយកនាងឲ្យបាននោះ ពុំសមនឹងយើងហៅថាសុភាពបុរសនោះទេ ហើយក៏គ្មានលក្ខណសម្បត្តិអ្វីគ្រប់គ្រាន់មកស្រលាញ់គេដែរ ។ យើងត្រូវដឹងចំណុចមួយថា៖ «ស្នេហាអាចគ្រាន់តែជាមួយផ្នែកនៃជីវិតរបស់មនុស្សប្រុស ប៉ុន្តែវាគឺជាអ្វីៗគ្រប់យ៉ាងនៃជីវិតរបស់មនុស្សស្រី…» ៕
