ពាក្យមួយឃ្លាដែលគេតែងតែនាំគ្នានិយាយតៗគ្នា នៅពេលគេពិភាក្សាពីគំលាតរវាងទីតាំងមួយ ទៅទីតាំងមួយចំពោះរឿងស្នេហា។ឃ្លាតឆ្ងាយណាយចិត្ត ឃ្លាមួយនេះ ប្រហែលជាអ្នកក៏ធ្លាប់បានប្រើរដែរ។ តើពាក្យនេះពិតដែរឬទេ?
ជាការពិតណាស់ គ្មាននរណាម្នាក់អាចបដិសេដនូវអត្ថន័យរបស់គំលាតនៃផែនដីសំរាប់សេចក្តីស្នេហាបានឡើយ ។ ស្នេហាមានឧបសគ្គជាច្រើន ការរារាំងពីបណ្តាបញ្ហាទាំងឡាយ ការរត់តាមសម័យសំភារៈនិយម ការស្តាប់ពីសំដីបញ្ចុះបញ្ចូលចាក់រុក ការបង្ខំចិត្តធ្វើដើម្បីគ្រួសារ ត្រូវគំរាមដោយភាពលំបាកនៃជីវភាព និងភាពឯកោដោយគ្មានអ្នកលើកទឹកចិត្ត ។ ហេតុអី្វបានជាពាក្យ ឃ្លាតឆ្ងាយណាយចិត្ត ត្រូវប្រើច្រើនជាង នៅពេលដែលមានគូស្នេហ៍មួយគូរៀបនឹងត្រូវរស់នៅឆ្ងាយពីគ្នា ។
តារា និងកញ្ញា ជាគូស្នេហ៍ដែលស្រលាញ់គ្នាអស់រយៈពេល ៣ឆ្នាំមកហើយ ពួកគេទាំងពីរសន្យាថានឹងរៀបការជាមួយគ្នា និងសង្ឃឹមថា នឹងគ្មានបញ្ហាអ្វីកើតឡើងចំពោះពួកគេឡើយ ។ ពួកគេស្រលាញ់គ្នាស្ទើរលេប បាត់មុខមិនបាន ។ ម្យ៉ាងទៀតឪពុកម្តាយសងខាង ក៏បានដឹងលឺរឿងនេះដែរ ។ តារា ជាមនុស្សចូលចិត្តហ៊ឺហារ ចូលចិត្តចំរៀង ដើរលេង តែគេក៏មិនចោលការរៀនសូត្រដែរ ។ តារារៀនពូកែ ឆ្លាត មានរូបរាងសង្ហា គួរសម ដូចនេះគេមិនពិបាកក្នុងការទាក់ទងស្រីៗ នោះទេ ប៉ុន្តែគេដូចជាមានចិត្តស្មោះនឹងកញ្ញាណាស់ ។ កន្លះឆ្នាំក្រោយ ព្រឹត្តការណ៍មួយដែលមិនធ្លាប់គិតថានឹងកើត ក៏បានកើតឡើង ដែលធ្វើអោយតារាពិបាកនឹងសំរេចចិត្ត ហើយកញ្ញាក៏ស្ទើរតែមិនអាចនឹងទទួលយកបាន ។
កញ្ញា៖ បងកុំទៅអី បានទេ?
តារា៖ បងមិនមែនទៅរហូតមិនត្រឡប់មកវិញឯណា? បងក៏មិនចង់ឃ្លាតឆ្ងាយពីអូនដែរ តែនេះជាឧកាសល្អ ហើយបងក៏អាចជួយដល់គ្រួសាររបស់បងបាន ណាមួយដើម្បីអនាគតរបស់យើងទាំងពីរនោះអី ។
(តារា មានមិត្តភក្តិដែលរស់នៅអាមេរិក ហើយគេក៏បានធានានាំតារាទៅនៅទីនោះ ហើយមានការងារធ្វើដែលទទួលបានចំណូលខ្ពស់ ។ រឿងនេះធ្វើអោយតារាមានការលំបាកក្នុងការដោះស្រាយ និងធ្វើការសំរេចចិត្តយ៉ាងខ្លាំង តើគេនឹងអាចបោះបង់ឧកាសនេះចោលទេ?)
កញ្ញា៖ សល់តែ ១ឆ្នាំ កន្លះ ទៀតតែប៉ុណ្ណោះបងរៀនចប់ហើយ ដូច្នេះបងអាចធ្វើការនៅស្រុកយើងបានតើ ។
តារាៈ ប៉ុន្តែការងារនៅទីនោះទទួលបានប្រាក់ខែច្រើនជាងឆ្ងាយណាស់ បងអាចផ្គត់ផ្គង់គ្រួសាររបស់បងបានយ៉ាងងាយស្រួល ណាមួយប្អូនប្រុសតែម្នាក់គត់របស់បង ជិតចូលមហាវិទ្យាល័យហើយ បងមិនមាននរណាផ្គត់ផ្គង់គេនោះទេ ។ ម្យ៉ាងទៀត បងនឹងមានលុយច្រើនឆាប់រៀបការជាមួយអូន ហើយជូនអូនដើរលេងគ្រប់ទីកន្លែងនោះអី? ក្រែងនោះជាក្តីសុបិន្តរបស់អូនមែនទេ?
កញ្ញា៖ គេថា ឃ្លាតឆ្ងាយណាយចិត្ត…….បងដាច់ចិត្តទុកអូនអោយនៅម្នាក់ឯង មែនទេ?
តារា៖ ស្រីឆ្គួត…..អ្នកណានិយាយ? កុំប្រើពាក្យនេះ អូនសំលាញ់វាហួសសម័យហើយ ។ នេះជាសម័យ Internet ហើយណា ទោះបីយើងនៅឆ្ងាយពីគ្នាមែនពិត តែយើងក៏នៅអាចទាក់ទងគ្នាបានជាប្រចាំ ហើយបងជាមនុស្សយ៉ាងម៉េចអូនក៏ដឹងហើយ ។
(កញ្ញាតែងតែនិយាយនូវឃ្លានេះ រាល់ពេលដែលបានជួបតារា ចំណែកតារាក៏តែងតែបដិសេដនូវពាក្យនេះ) ។
ទីបំផុត តារាក៏សំរេចចិត្តថានឹងទៅអាមេរិក ដោយព្យួរការសិក្សា ស្ថាបត្យកម្ម ដែលនឹងបញ្ចប់ក្នុងរយៈពេល ១ ឆ្នាំ កន្លះទៀតតែប៉ុណ្ណោះ ។ ១ខែទៀតតារានឹងត្រូវចេញដំណើរហើយ ចំណែកកញ្ញាវិញ នាងមិនអាចឃាត់តារាមិនអោយចាកចេញពីនាងបានឡើយ ។ នាងបានត្រឹមខំញញឹមទាំងក្រៀមក្រំ ហើយព្យាយាមមកជួបតារាអោយបានញឹកញាប់បំផុត មុនពេលដែលគេត្រូវចាកចេញពីខ្លួន ។ ថ្ងៃស្អែកនេះ តារាត្រូវឡើងយន្តហោះ យប់នេះកញ្ញាគេងមិនលក់ឡើយ នាងអង្គុយចាក់កន្សែងបង់ក ទុកជូនសង្សារជាកាដូចុងក្រោយមុនពេលដែលគេចាកចេញ ។
ប្រដាប់ប្រដាបានរៀបចំជាស្រេចតាំងតែពីថ្ងៃមុន ព្រលឹមតារាចាប់ផ្តើមត្រៀមខ្លួនធ្វើដំណើរទៅព្រលានយន្តហោះ ។
ទិដ្ធភាពលាគ្នានៅព្រលានយន្តហោះពិតជាមិនអាចបំភ្លេចបានសម្រាប់គូស្នេហ៍មួយគូនេះ ។
កញ្ញា៖ កន្សែងនេះអូនជូនបង អកាសធាតុនៅទីនោះត្រជាក់ណាស់ បងត្រូវពាក់វាណា ហើយនឹកដល់អូនផង ។
តារា៖ បាទ! បងនឹងនឹកដល់អូនគ្រប់ពេល ហើយបង់កន្សែងនេះនឹងករបស់បងគ្រប់ពេលដែរ ។
សំលេងចុងក្រោយបំផុត ត្រូវបានបន្លឺឡើងគួរអោយស្រងេះស្រងោច ទឹកភ្នែកលាគ្នាដែលជោរជន់ពេញបេះដូងនាង ត្រូវបានហូរចេញដោយពុំអាចទប់បាន ។
កញ្ញា៖ តារា អូនរង់ចាំបង…
តារា៖ បងនឹងត្រលប់មកវិញ អូនកុំយំអីណា យើងនឹងរៀបការជាមួយគ្នាណា ។
កញ្ញា៖ បងសន្យាជាមួយអូនណា?
តារា៖ បងសន្យា….
កញ្ញាអោបតារាជាប់នឹងដើមទ្រូង ស្ទើរតែមិនចង់លែងព្រោះនាងមិនចង់អោយមនុស្សដែលខ្លួនស្រលាញ់ឃ្លាតឆ្ងាយ ។
តារាចូលទៅក្នុងសាលព្រលានយន្តហោះ ចំណែកកញ្ញាតាមមើលរហូតដល់បាត់ពីកន្ទុយភ្នែក ។
ប៉ុន្មានថ្ងៃក្រោយទៅដល់អាមេរិក តារាក៏ទូរស័ព្ទមករកកញ្ញា មានពេលខ្លះពួកគេសើច ហើយពេលខ្លះក៏យំដូចជាកូនក្មេងអញ្ចឹង ។ មួយខែម្តងៗ តារាតែងតែទូរស័ព្ទមកសួរសុខទុក្ខកញ្ញា ធ្វើអោយនាងមានសង្ឃឹមថានឹងដូចអ្វីដែលបានសន្យា ។
រយៈពេល២ឆ្នាំបានកន្លងផុតទៅយ៉ាងយូរបំផុតសម្រាប់មនុស្សម្នាក់ដែលស្ថិតនៅក្នុងការរង់ចាំ ។ កញ្ញាបានបញ្ចប់ការសិក្សានៅមហាវិទ្យាល័យ ហើយនាងបានធ្វើការនៅក្រុមហ៊ុនទេសចរណ៍មួយ ។ មានពេលខ្លះនាងនឹកស្រម៉ៃដល់អានុស្សាវរីយ៍កន្លងមករវាងនាងនិងតារា ធ្វើអោយនាងញញឹម ស្របពេលដែលទឹកភ្នែកកំពុងស្រក់ចុះ ។ ចំណែកតារាវិញមានការងារធ្វើដែលបានទទួលប្រាក់ខែខ្ពស់ហើយគេបានផ្ញើរប្រាក់មកផ្គត់ផ្គង់គ្រួសារគេជាប្រចាំ ហើយក៏មិនភ្លេចផ្ញើររបស់មកកញ្ញាដែរ គេមិនដែលបានមកលេងស្រុកកំណើតឡើយ ព្រោះការងាររវល់ពេក ប៉ុន្តែគេតែងទូរស័ព្ទមកកញ្ញាជាប្រចាំ ។
១ឆ្នាំក្រោយមក សំលេងទូរស័ព្ទមកពីអាមេរិកកាន់តែមានគំលាតទៅៗ កញ្ញាចាប់ផ្តើមមានគំនិតសង្ស័យលើតារាកាន់តែខ្លាំងឡើងៗ ធ្វើអោយនាងគេងមិនលក់ បក់មិនល្ហើយ ព្រោះនឹកដល់ម្ចាស់ស្នេហ៍ ។ នាងអោបក្រសោបនូវសេចក្តីវេទនានេះតែម្នាក់ឯងរកថ្លែងមិនរួច រាល់ថ្ងៃនាងនឹកដល់តារាខ្លាំងណាស់ មិនដឹងថាពេលណាគេត្រលប់មករកនាងវិញឡើយ ។
បន្ទាប់ពីការរង់ចាំអស់រយៈពេល ៣ឆ្នាំ កញ្ញាក៏បានទទួលដំណឹងថា តារាមានប្រពន្ធហើយ គេជាប្អូនស្រីរបស់មិត្តភក្តិតារា ។ កញ្ញាហាក់មិនជឿនឹងអ្វីដែលបានលឺសោះ នាងក៏ដាច់ចិត្តទូរស័ព្ទទៅរកតារាព្រោះនាងចង់ស្តាប់លឺសំដីចេញពីមាត់របស់តារា ។
កញ្ញា៖តារា! បងសុខសប្បាយជាទេ? មួយរយៈនេះមិនឃើញបងទូរស័ព្ទមករកអូនសោះ តើបងរវល់ណាស់មែនទេ?
តារា៖ មែនហើយ បងរវល់ណាស់
កញ្ញា៖អូនបានទទួលដំណឹងថាបងរៀបការរួចហើយ តើនេះជាការពិតទេ?
តារា៖ មែន! បងបានរៀបការរួចហើយ បងសូមទោសដែលមិនបានប្រាប់អូនពេលនោះ ព្រោះបងខ្លាចអូនទទួលយកមិនបាន ។
កញ្ញា៖ហេតុអីក៏បងធ្វើបែបនេះដាក់អូន? ហេតុអ្វីបងធ្វើអោយអូនជឿបងស្លុងចិត្ត រង់ចាំបងអស់ជាច្រើនឆ្នាំ ហើយពេលនេះបងបែរជារៀបការជាមួយអ្នកផ្សែងដោយមិនប្រាប់អូន ។
តារា៖ សុំទោស! អូនបំភ្លេចបងចោលចុះ ព្រោះបងជាមនុស្សមិនល្អ ។ រកមនុស្សប្រុសណាម្នាក់ដែលល្អជាងបង ហើយសាងអនាគតជាមួយគេចុះ ។
បេះដូងនាងក្រមុំរូបនេះ ស្ទើរប្រេះបែកជាពីរបន្ទាប់ពីបានស្តាប់សំដីរបស់តារា នាងមិននឹកស្មានថាស្នេហាដ៏រឹងមាំមួយនេះ ត្រូវបានកាត់ផ្តាច់ដោយសារគំលាតនៃផែនដីសោះ ។
ឯណាទៅពាក្យសន្យារបស់បង? ឯណាទៅក្តីសង្ឃឹមដែលបងធ្លាប់បានផ្តល់អោយអូន? តើបងពិតជាអាចបំភ្លេចអានុស្សាវរីយ៍ដែលយើងធ្លាប់បានសាងរួមគ្នាកន្លងមកមែនទេ? ស្នេហារបស់យើងរយៈពេល ៦ឆ្នាំមកនេះ ពិតជាគ្មានន័យក្នុងបេះដូងបងសោះមែនទេ?បងមិនដឹងថារយៈពេល ៣ឆ្នាំដែលបងចាកចេញពីអូននេះ អូនរស់នៅអោបជាប់នឹងការរង់ចាំ ឯកោ រាល់ថ្ងៃអូនតែងស្រម៉ៃថាបងនឹងមករស់នៅក្បែរអូន ពេលខ្លះអូនយំ ព្រោះអូនពិតជានឹកបងខ្លាំងណាស់ តែពេលអូននឹកដល់សំដីរបស់បង វាធ្វើអោយអូនញញឹម ហើយចាប់ផ្តើមរង់ចាំបងបន្តទៅទៀត ។ តែពេលនេះបងប្រាប់អូនថាបងរៀបការហើយ សំដីចុងក្រោយ បានត្រឹមនិយាយថា សុំទោស បងប្រាប់អូនអោយបំភ្លេចបងចុះ បងប្រាប់អូនអោយសាងអនាគតជាមួយមនុស្សថ្មីដែលល្អជាងបងចុះ ព្រោះបងជាមនុស្សមិនល្អ ។
ពេលនេះបេះដូងអូនឈឺ អូនពិតជាឈឺខ្លាំងណាស់ បងធ្វើអោយអូនដួលទាំងជំហរ អូនអស់កំលាំងណាស់ ស្ទើរតែមិនអាចបោះជំហានទៅមុខរួច ។ ស្រមោលអានុស្សាវរីយ៍គ្រប់ទីកន្លែងរុំរិទ្ធបេះដូងអូន តើអោយអូនបំភ្លេចបងម្តេចបាន រាប់រយសំនួរចាក់ស្រេះក្នុងចិត្តអូន តើហេតុអ្វីបងធ្វើដាក់អូនបែបនេះ ?
