ស្វែងយល់ពីអាថ៌កំបាំងក្នុងចិត្តនារីៗ (១)

និយាយដល់ការយល់អំពីចិត្តនារីៗ អាចនឹងមានបុរសៗជាច្រើនលើកឡើងថា៖ «ចង់ស្វែងយល់ពីចិត្តមនុស្សស្រី បីដូចជារៀវម្ជុលក្នុងបាតសមុទ្រអញ្ចឹង ពិតជាធ្វើឲ្យខ្ញុំឈឺក្បាលខ្លាំងណាស់!!»។ ការពោលឡើងដូច្នេះ ជួនកាលគ្រាន់ជាលេសបន្តិចបន្តួចសម្រាប់យករួចខ្លួនរបស់បុរសៗប៉ុណ្ណោះ តាមពិតទៅក្នុងនាមជាបុរសម្នាក់ពិតប្រាកដ គាត់ត្រូវព្យាយាមយកចិត្តរបស់ខ្លួនទៅតាមស្វែងយល់ និងបញ្ជាក់ឲ្យយល់ពីចិត្តរបស់មនុស្ស ដែលខ្លួនស្រលាញ់នោះដោយស្មោះអស់ពីដួងចិត្តទើបជាការគួរសម្រាប់សុភាពបុរសយើង។

តើមនុស្សប្រុសយើងត្រូវចាំរហូតដល់ពេលណាទើបអាចយល់ពីរូបមន្តសម្ងាត់ក្នុងចិត្តរបស់មនុស្សស្រីបាន? ស្រលាញ់រាប់អានគ្នា ឬរួមរស់នៅជាមួយគ្នាអស់រយៈពេលច្រើនឆ្នាំ ប្រហែលជាក្នុងអំឡុងពេលនោះ អ្នកទាំងពីធ្លាប់មានអនុស្សាវរីយ៍ដ៏ផ្អែមល្ហែមនិងគ្នា ឬយ៉ាងរ៉ូមែនតិចនិងគ្នាក្រោមពន្លឺភ្លើងទៀន ហើយពេលខ្លះក៏អាចឈ្លោះប្រកែកគ្នាយ៉ាងតឹងសរសៃកដាក់គ្នាដែរ។ ជារៀងរាល់ឆ្នាំ នៅក្នុងឱកាសណាមួយនោះ ឬក៏ច្រើន អ្នកក៏ធ្លាប់ជូនអំណោយដល់នារីដែលអ្នកស្រលាញ់នោះដែរ។ ប៉ុន្តែ ក្នុងនាមជាមិត្តប្រុស ឬស្វាមី (ជាបុរសម្នាក់ដែលស្រលាញ់នាង) តើអ្នកធ្លាប់គិត ឬដឹងថាការពិតនារីដែលអ្នកស្រលាញ់ និងមើលថែរក្សានោះ ក្នុងចិត្តរបស់នាងតែងប្រាថ្នាចង់បានអ្វីដែរឬទេ? នៅពេលខ្លះមនុស្សមិនអាចមើលយល់អំពីចិត្តរបស់មនុស្សស្រីនោះទេ ដោយសារតែនាងមានភាពកំបាំងចិត្តទុកមិនបង្ហាញចេញមកក្រៅ ឬក៏ថានាងមានសេចក្តីគោរព និងឲ្យតម្លៃចំពោះខ្លួនខ្ពស់។ ប៉ុន្តែបើអ្នកជាបុរសដែលស្រលាញ់នារីម្នាក់នោះពិតប្រាកដមែននោះ គួរត្រូវដឹង និងចេះពិចារណាអំពីលក្ខខណ្ឌ/ស្ថានភាពមួយចំនួនដូចខាងក្រោមនេះ ហើយខំប្រឹងធ្វើវាឲ្យបានទៅគឺប្រសើរណាស់ទៅហើយ។

មនុស្សស្រីចូលចិត្តឲ្យមនុស្សប្រុសនៅក្បែរនាង និងស្តាប់សម្តីចេញពីចិត្តរបស់នាងដោយយកចិត្តទុកដាក់

មនុស្សប្រុសគឺសនិទាន (និយាយហេតុផល ឬយកហេតុផលសម្រេចសេចក្តី) ដូច្នេះហើយ ក្នុងចិត្តរបស់មនុស្សប្រុសនៅពេលធ្វើការសន្ទនាគ្នានោះ តែងតែស្វែងរកនូវរឹសគោលនៃបញ្ហា ដើមចងនៃរឿង រួចធ្វើសុភ័ក្រ្តវិនិច្ឆយថាត្រូវឬខុស ស ឬខ្មៅ បន្ទាប់មកត្រិះរិះរកមធ្យោបាយដើម្បីដោះស្រាយបញ្ហា។ ទាំងនេះគឺជាខ្សែចិត្ត ឬផ្លូវដើរក្នុងគំនិតរបស់មនុស្ស។ ប្រហែលជាយ៉ាងដូចនេះហើយ នៅពេលនិយាយគ្នាជាមួយនិងមនុស្សស្រី មនុស្សប្រុសអាចតែងតែ កាត់សម្តីរបស់មនុស្សស្រី ហើយចេះតែនិយាយពីគំនិតរបស់ខ្លួនថាយ៉ាងនេះថាយ៉ាងនោះ ព្យាយាមរហូតឲ្យមនុស្សស្រីយល់ពីហេតុផលរបស់ខ្លួន ដោយមិនបានគិតដល់ថា មនុស្សស្រីមិនចង់ស្តាប់មតិយោបល់ពីគាត់នោះឡើយ ។ ជាជាងដូច្នេះ ផ្ទុយមកវិញនោះគឺមនុស្សស្រីចង់ឲ្យមនុស្សប្រុសនៅក្បែរខ្លួន និងស្តាប់សម្តីគ្រប់ម៉ាត់ដែលខ្លួនបាននិយាយដោយយកចិត្តទុកដាក់ ហើយនិយាយរហូតដល់ក្នុងចិត្តរបស់នាងបានធូរស្បើយអស់ពីចិត្តហើយ ទើបពេញចិត្ត និងទទួលបានភាពរីករាយពីដៃគូ។

មនុស្សស្រីចូលចិត្តធ្វើមិត្តជាមួយបុរស ដែលខ្លួនស្រលាញ់ជាងសង្សារ

ហេតុអ្វីបានជាមនុស្សស្រីចូលចិត្តឲ្យបុរសដែលខ្លួនស្រលាញ់ចាត់ទុកខ្លួនដូចជាមិត្តភកិ្តរបស់គាត់? ពីព្រោះ ដើម្បីទទួលបានបានស្រលាញ់រាប់អាន ការគោរពសិទ្ធិក្នុងឋានៈស្មើភាពគ្នារវាងបុរស និងស្រ្តី ការគោរពសរសើរពីចំណុចល្អរបស់ខ្លួន និងយោគយល់អាធ្យាស្រ័យដល់ចំណុចមិនល្អ ឬខុសឆ្គងដែលមាននោះ ហើយនាងក៏ពេញចិត្តតបស្នងទៅវិញនូវអ្វីដែលនាងបានទទួលពីបុរសដែលនាងស្រលាញ់ និងគិតថានឹងអាចរួមរស់និងគ្នាដល់ចាស់។ មនុស្សស្រីមានភាពភ័យខ្លាចថាខ្លួនមិនស្អាតគ្រប់គ្រាន់ក្នុងស្នេហាពីបុរសដែលខ្លួនស្រលាញ់ ដូច្នេះនាងតែងតែចូលចិត្តពាក្យសរសើរពីគាត់ ដូចជា៖ «សក់របស់អូនស្អាតណាស់» ឬក៏ «ពេលអូនស្លៀកសំពត់មួយនេះទៅគឺមានសម្រស់កាន់តែស្អាតទៅទៀត» ជាដើម ។ល។ នៅពេលបានឮសម្តីដូចនេះពីមាត់បុរសដែលខ្លួនស្រលាញ់ហើយនោះ វាអាចជាថាមពលមួយជំរុញលើកទឹកចិត្តដល់នាងក្នុងសេចក្តីស្នេហានេះ ធ្វើឲ្យនាងកាន់តែមានជំនឿជាក់ ហើយសេចក្តីស្នេហារបស់អ្នកទាំងពីរក៏កាន់តែរីកចំរើនឡើងៗផងដែរ។

ជានារីមែនពិត ក៏យកការងារជាធំដូចបុរសដែរ

មនុស្សស្រីកាន់តែចង់ឲ្យ ឬកាន់តែសង្ឃឹមថាបុរស ដែលខ្លួនស្រលាញ់ឲ្យតម្លៃ និងចាត់ទុកការងាររបស់នាងសំខាន់ ដូចដែលបុរសៗយកការងាររបស់ខ្លួនជាធំអញ្ចងដែរ។ ពិសេសនៅពេលលើកដល់ការងាររបស់នាង សុភាពបុរសយើងត្រូវចេះឲ្យតម្លៃ និងយកចិត្តទុកដាក់ស្តាប់ ហើយយល់ពីការងាររបស់នាង នៅពេលដែលយើងចេះសម្របអំពីចំណុចការងាររបស់មនុស្សបានល្អហើយនោះ មនោសញ្ចេតនា និងសេចក្តីស្រលាញ់របស់អ្នកទាំងពីរនឹងកាន់តែជ្រាលជ្រៅឡើងៗមិនខាន។

នារីៗមិនចិត្តងាយដូចបុរសៗយើងទេ ពិសេសធ្លាក់ក្នុងអណ្តៅស្នេហ៍

បើតាមការស្រាវជ្រាវមួយបានឲ្យដឹងថា បុរសប្រមាណជា២៥% ក្នុងករណីស្រាវជ្រាវនោះ គឺបានចាប់ចិត្តស្រលាញ់មនុស្សស្រីដែលខ្លួនបានជួបគ្រាដំបូង គឺត្រឹមតែជួបគេលើកទីមួយប៉ុណ្ណោះ ក៏ចាប់ចិត្តប្រតិព័ទ្ធបាក់ស្រលាញ់គេភ្លាមៗតែម្តង។ ដែលខុសអំពីមនុស្សស្រី គឺត្រឹមតែ១៥%ប៉ុណ្ណោះដែលស្រលាញ់មនុស្សប្រុសវិញ ប៉ុន្តែមិនមែននៅលើកទី១បានជួបគ្នានោះទេ គឺអាចស្រលាញ់បុរស ដែលខ្លួនបានជួបពីលើកទី៤ទៅ។ ពីព្រោះនៅពេលដែលមនុស្សស្រីជ្រើសរើសគូស្រករ ជាពិតណាស់នឹងពិចារណាមើលលើលក្ខខណ្ឌជាក់ស្តែងជាច្រើនគ្រប់បែបយ៉ាង។ នារីៗយើង ពិតណាស់គឺប្រាថ្នាចង់បានសេចក្តីស្នេហា ក៏ប៉ុន្តែនៅទន្ទឹមនិងគ្នានោះដែរ ក្នុងចិត្តរបស់នាងក៏កំពុងពិចារណាថា បុរសម្នាក់នេះពិតជាអាចទុកចិត្តបានមែនឬអត់ ពិតជាអាចឲ្យនាងពឹងផ្អែកទៅថ្ងៃអនាគតបានឬយ៉ាងណា? ដូចនេះ បុរសៗយើងក្រៅពីមានការប្រុងប្រយ័ត្នចំពោះរូបរាងខាងក្រៅរបស់ខ្លួន ដូចជាម៉ូតសក់ ការស្លៀកពាក់ និងអកប្បកិរិយាមួយចំនួនខាងក្រៅហើយនោះ ត្រូវរៀបចំចរិតឥរិយាឲ្យបានថ្លៃថ្នូរ ចិត្តទូលាយ និងស្មោះត្រង់គួរឲ្យគេមើលទៅថាអាចពឹងផ្អែក និងចិញ្ចឹមកូនក្រមុំគេបានពេញមួយជីវិតមែនផង។

មនុស្សស្រីចូលចិត្តលាក់កំបាំងនូវមនោសញ្ចេតនាដ៏សែនជ្រាលជ្រៅរបស់ខ្លួន

ប្រសិនបើអ្នកសួរសំណួរនេះទៅកាន់មនុស្សប្រុស៖ «តើរបស់នេះអ្នកបាន/ទិញវាពីណាមក» នោះគាត់នឹងឆ្លើយប្រាប់អ្នកតាមត្រង់វិញភ្លាមថាគាត់បាន/ទិញពីណាមក។ ប៉ុន្តែប្រសិនបើអ្នកសួរសំណួរដដែរនេះទៅកាន់មនុស្សស្រីវិញ នោះនាងនឹងបកសួរអ្នកវិញភ្លាមថា៖ «ម៉េចទៅ? របស់នេះមានបញ្ហាអីមែនបានសួរខ្ញុំអញ្ចង?» ។ ដូច្នេះនៅពេលដែលអ្នកព្យាយាមស្វែងយល់អំពីមនុស្សស្រីមិនត្រូវសន្និដ្ឋានតែម្ខាង ឬចំណុចមួយដែលនាងបានបង្ហាញចេញមកនោះទេ អ្នកត្រូវព្យាយាមស្វែងយល់ឲ្យបានស៊ីជម្រៅជាងនេះ ពិសេសគឺរឺសគោលរបស់វា តាមរយៈរឺសគោលដ៏ប្រាកដបំផុតទៅស្វែងយល់ និងស្វែងរកចម្លើយដែលអ្នកចង់បាននោះ។

តាមរយៈការអានមួយចំនួនខាងលើ ប្រិយមិត្តប្រហែលជានឹងយល់ខ្លះហើយមើលទៅអំពីអាថ៌កំបាំងក្នុងចិត្តរបស់មនុស្សស្រីនោះ ប៉ុន្តែនេះនៅមិនទាន់ចប់នៅឡើយទេ យើងខ្ញុំសូមអធ្យាស្រ័យសុំអនុញ្ញាតស្លេះបង្អង់អត្ថបទនេះត្រឹមប៉ុននេះសិនចុះ ដើម្បីឲ្យប្រិយមិត្តបានសម្រាកភ្នែកបន្តិច រួចទើបទៅអានអត្ថបទបន្ទាប់ជាបន្តពីអត្ថន័យនៃអត្ថបទនេះបន្តទៀត។

នៅមានបន្ត អត្ថបទ៖ «ស្វែងយល់ពីអាថ៌កំបាំងក្នុងចិត្តនារីៗ (២)»