ក្នុងទំនាក់ទំនងស្នេហា រវាងបុរសនិងនារី ភាគីទាំងពីរមិនថា នៅមុនពេល ឬបន្ទាប់ពីចាប់ស្រឡាញ់គ្នានោះទេ រមែងព្យាយាមចង់ស្វែងយល់អំពីដៃគូរបស់ខ្លួនថាយ៉ាងណា។ មិនថាចង់ដឹងពីដៃគូរបស់ខ្លួន ដើម្បីយកចិត្ត សម្របតាម ឬងាយរៀបយុទ្ធសាស្រ្ដស្នេហា និងក្នុងគោលបំណងណាមួយនោះឡើយ ទាំងនេះសុទ្ធតែជាអ្វីដែលស្ថិតក្នុងចិត្តរបស់អ្នកមានស្នេហាគ្រប់គ្នា។ ក្នុងអត្ថបទនេះ ខ្ញុំនឹងលើកយកតេស្ដចិត្តមួយ ដែលអាចស្មានដឹងពីឥរិយាបថរបស់បុរសៗពេលមានទំនាក់ទំនង ឬឈានដល់សេចក្ដីស្នេហានឹងនារីៗ ។
ដូចនេះ ចំពោះសុភាពនារីៗទាំងអស់ ប្រសិនបើអ្នកចង់ដឹងថា អ្នកដែលកំពុងលួចស្រឡាញ់អ្នក (ឬបុរសដែលអ្នកកំពុងលួចស្នេហា) មិត្តភក្ដិ (ភេទប្រុស) ឬជ្រើសរើសបុរសណាម្នាក់ដើម្បីសេពគប់នោះ អាចសាកល្បងយកតេស្ដនេះសួរឱ្យគាត់ជ្រើសរើសចម្លើយលមើល ថាតើគាត់នឹងជាបុរសប្រភេទណាក្នុងទំនាក់ទំនងស្នេហានោះ។ ចំពោះបុរសៗវិញ ប្រសិនបើអ្នកចង់ស្វែងយល់ឱ្យកាន់តែច្បាស់ពីខ្លួនឯងទៀតនោះ ក៏អាចសាកល្បងឆ្លើយនឹងសំណួរខាងក្រោមនេះ និងអាននូវសេក្ដីសន្និដ្ឋានលើចម្លើយនីមួយៗដូចតទៅនេះ។
សំណួរ៖ ចាត់ទុកថា ក្នុងដៃរបស់អ្នកមានកាន់ក្រដាសមួយសន្លឹក ហើយអ្នកនឹងចោលក្រដាសនោះ តើអ្នកនឹងចោលក្រដាសនោះបែបណាដែរ? ចូរជ្រើសរើសចម្លើយមួយ និងអានសេចក្ដីសន្និដ្ឋាននៃចម្លើយដូចខាងក្រោម។
ក. ចោលក្រដាសនោះទាំងសន្លឹក
ខ. បត់ជាពីររួចទើបចោល
គ. ក្ដាប់ហើយចោល
ឃ. ក្ដាប់ចូលគ្នាជាដុំមូលទើបចោល
ង. ហែកជាសន្លឹកតូចទើបចោល
បន្ទាប់ពីជ្រើសរើសនូវចម្លើយរួច ចូរអានសេចក្ដីអធិប្បាយសន្និដ្នាននៃចម្លើយនីមួយៗដូចខាងក្រោម៖
ក. ចោលក្រដាសនោះទាំងសន្លឹក
ជាបុរសមានការគោរពជាខ្លាំងចំពោះស្រ្ដីភេទ ក៏មានថាគាត់មានស្មារតីយកចិត្តទុកដាក់ និងឱ្យតម្លៃចំពោះសមភាពយេនដឺខ្ពស់ ផ្ដល់សមតុល្យសិទ្ធិស្មើគ្នារវាងបុរសនារី។ ជាបុរស ដែលគោរពលើការសម្រេចចិត្ត ឬភាពម្ចាស់ការរបស់ដៃគូ ឬភាគីទាំងសងខាង ហើយខ្នាក់ខ្នែងខ្លាំងបែបសេរីភាពស្នេហា និងជាអ្នកស្រឡាញ់ការថែទាំរាងកាយ ដូចនេះ ទើបឥរិយាបថក្នុងការចោលក្រដាសរបស់គាត់ចោលទាំងសន្លឹកនៅល្អនោះ។
ខ. បត់ជាពីររួចទើបចោល
មិនត្រឹមតែជាបុរសមានការយកចិត្តទុកដាក់ម៉ត់ចត់ចំពោះមនុស្សស្រី ហើយក៏ជាបុរសមានការជឿជាក់ និងការទុកចិត្តខ្ពស់ចំពោះនារីដែលខ្លួនស្រឡាញ់ទៀតផង ។ ដោយឥរិយាបថ ដែលគាត់បត់ក្រដាសជាពីរសិនទើបចោលនេះ បានបង្ហាញថា គាត់មនុស្សប្រុសមានការស្វែងយល់ និងយកចិត្តទុកដាក់ចំពោះអារម្មណ៍ ក៏ដូចជាចិត្តគំនិតរបស់នារីៗ ពេលមានទំនាក់ទំនងស្នេហានេះណាស់ ប៉ុន្ដែ នេះក៏ជាហេតុធ្វើឱ្យគាត់ខាតបង់ ពេលជួបនារីៗ ដែលមានចិត្តចង់លេងសើចនឹងគាត់ ចង់ធ្វើបាបគាត់ គ្រាន់តែពង្វក់គាត់ ដោយមិនមែនជាសេចក្ដីស្រឡាញ់ពិតនោះ ព្រោះគាត់តែងតែគិតពីអារម្មណ៍របស់ដៃគូស្នេហាពេក ធ្វើឱ្យខ្លួនកាន់តែឈឺចាប់ពេលត្រូវបានដៃគូបោះបង់ចោលនោះ។
គ. ក្ដាប់ហើយចោល
លើឥរិយាបថនេះ បង្ហាញថាជាបុរសដែលរមែងខកចិត្តរវល់ពេលមានទំនាក់ទំនងស្នេហា ហើយក៏តែងតែឆាប់មានអារម្មណ៍ស្នេហា ឬស្រឡាញ់នារីៗដែលមានអាយុច្រើនជាងខ្លួន និងឧស្សាហ៍មានការប្រាស្រ័យទាក់ទងគ្នា រស់នៅជាមួយគ្នានឹងមនុស្សស្រីមានអាយុច្រើនជាងខ្លួននោះ ។ រាល់ពេលពុំទទួលបានការយល់ស្របក្នុងមនោសញ្ចេតនាពីដៃគូ ឬត្រូវបានគេបដិសេធ និងការបែកបាក់គ្នាជាដើមនោះ គាត់នឹងអាចប្រើការបង្ខំទៅលើដៃគូ ដោយហិង្សា ឬកម្លាំងបាយទៀតផង។
ឃ. ក្ដាប់ចូលគ្នាជាដុំមូលទើបចោល
ក្នុងឥរិយាបថបែបនេះ ការក្ដាប់ក្រដាស់ចូលគ្នា ប្រៀបដូចការក្ដាប់បញ្ចូលទុកក្នុងតែកណ្ដាលបាតដៃរបស់ខ្លួន ក៏មានន័យថាជាបុរសដែលយកចិត្តខ្លួនឯងជាធំ អ្វីគ្រប់យ៉ាងត្រូវស្ដាប់ និងគោរពការសម្រេចចិត្តរបស់ខ្លួនឯង ពិសេសចង់ឱ្យដៃគូស្ដាប់ និងធ្វើតាមអ្វីដែលខ្លួនចង់បាន។ នៅពេលមានទំនាក់ទំនងស្នេហានឹងមនុស្សស្រីវិញក៏ដូច្នោះផងដែរ គឺគាត់ពុំ care ពីចិត្តរបស់ដៃគូសោះឡើយ ជាប្រភេទបុរសអត្តនោម័តិជានិយមពេញលេញ១០០%តែម្ដង។
ង. ហែកជាសន្លឹកតូចទើបចោល
ចំពោះឥរិយាបថបែបនេះ អាចចាត់ចូលជាប្រភេទបុរសនឹងមានទង្វើនៃការប្រើប្រាស់អំពើហិង្សាខ្ពស់ ឬមួយក៏គាត់ជាបុរសដែលធ្លាប់ និងតែងតែត្រូវបាននារីៗធ្វើបាប ឬក្បត់ចិត្តជាដើម ហើយក៏បណ្ដាលឱ្យគាត់ចាប់ផ្ដើមមានអារម្មណ៍គុំកួននឹងមនុស្សស្រី រមែងគិតថាស្អប់ និងចង់សងសឹក។ មិនថាក្នុងការរស់នៅធម្មតា ឬក្នុងទំនាក់ទំនងស្នេហានោះទេ បុរសបែបនេះ អាចចាត់ទុកថាជាមនុស្សបែបគួរឱ្យខ្លាច និងជាបុគ្គលគ្រោះថ្នាក់ខ្លាំងពេលសេពគប់ជាមួយ ដូចនេះ មិត្តនារីៗគួរប្រុងប្រយ័ត្ន ។
បញ្ជាក់៖ នេះគ្រាន់តែជាការធ្វើតេស្ដចិត្តសាស្រ្ដលេងកម្សន្ដប៉ុណ្ណោះ ពុំមែនជាការពិត១០០%នោះទេ ប៉ុន្ដែទាំងនេះ ប្រហែលអាចជាគំនិតយោបល់ជួយដល់ការគិចរបស់អ្នកឱ្យស៊ីជម្រៅជាងនេះ។ មានតែខ្លួនយើងទេ ជាអ្នកជួយខ្លួនឯង ពុំមានអ្នកណាម្ចាស់អាចមកកំណត់ផ្លូរជីវិតរបស់យើងបានឡើយ។
