ជារៀងរាល់ឆ្នាំយើងតែងតែមាននៅផែនការប្រចាំឆ្នាំរបស់ខ្លួនជាច្រើន សម្រាប់ការរស់នៅដូចជា គេងពីព្រលប់ក្រោកពីព្រលឹម សម្រកទំងន់ ហាត់ប្រាណឲ្យទៀងទាត់ បរិភោគចំណីអាហារឲ្យបានត្រឹមត្រូវ ក្រៅពីនេះនៅមានទំលាប់មិនល្អមួយចំនួនដែលធ្វើឲ្យរាំងស្ទាក់ដល់ការងារ ឬការសិក្សា ដូចជាការមើលទូរទស្សន៍ វីដេអូ ច្រើនម៉ោង លេងហ្វេសប៊ូកដល់យប់ជ្រៅ បន្ទប់គ្មានសណ្តាប់ធ្នាប់ជាដើម ក៏ស្ថិតនៅក្នុងផែនការកែប្រែខ្លួនឲ្យកាន់តែប្រសើរដើម្បីទទួលបានជោគជ័យក្នុងជីវិត។ ប៉ុន្តែយើងអាចមើលរំលងនៅអ្វីមួយចំនួន ដូចជាទំនាក់ទំនងស្នេហារវាងខ្លួនយើងជាមួយនិងគូស្នេហ៍/សង្សារ ឬប្តី/ប្រពន្ធ។ ដូចនេះ ពេលខ្លះយើងមានភាពមមាញឹកខ្លាំង ក៏អាចធ្វើឲ្យទំនាក់ទំនងស្នេហារបស់យើងមានបញ្ហាមិនល្អកើតឡើងដែរ។ យើងអាចគិតគូរពិចារណាដាក់ចូលវិធីសាស្រ្ត៧យ៉ាងដែលខ្ញុំបាទនឹងរៀបរាប់តទៅនេះទៅក្នុង ផែនការកែលំអខ្លួនឲ្យកាន់តែប្រសើរផង។ ជាបន្តទៅនេះខ្ញុំសូមវិធីសាស្ត្រ៧យ៉ាងដើម្បីឲ្យទំនាក់ទំនងស្នេហារបស់អ្នកកាន់តែប្រសើរឡើង ហើយក៏សង្ឃឹមថាមិត្តអ្នកអានទាំងអស់គ្នាអាចអនុវត្តទៅដោយជោគជ័យ និងមានមនោសញ្ចេតនាកាន់តែផ្អែមល្ហែមជាមួយនិងគួស្នេហារបស់ខ្លួន។
១. រក្សាចិត្តស្ងប់ និងមានភាពអំណត់គ្រប់ពេលវេលា
រក្សាចិត្តស្ងប់ និងមានភាពអំណត់គ្រប់ពេលវេលានឹងអាចជួយឲ្យអ្នកអាចគ្រប់គ្រងស្ថានការបានល្អ និងមានភាពងាយស្រួលក្នុងការសម្រេចចិត្តបានកាន់តែប្រសើរ ព្រមទាំងផ្តល់អារម្មណ៍មួយដល់ដៃគូរបស់អ្នកថាអ្នកជាមនុស្សម្នាក់ដែលស័ក្តិសមឲ្យគេស្រលាញ់ និងពឹងពាក់បានពិតមែន។ ក៏ប៉ុន្តែមិនត្រូវនៅស្ងប់ស្ងាត់ដល់លក្ខណៈថាធ្វើឲ្យដៃគូរបស់យល់ថាយើងមិនយកចិត្តទុកដាក់នឹងគេឲ្យសោះ ពោលគឺធ្វើចិត្តឲ្យត្រជាក់ និងរក្សាចិត្តឲ្យទូលាយ កុំបីឡើយតែរឿងរកាំរកូសតិចតួចធ្វើឲ្យខឹងសម្បារករឿងយកឈ្នះរៀងខ្លួនឲ្យសោះ វាអាចជាសម្ពាធមួយធ្វើឲ្យទំនាក់ទំនងរបស់អ្នកក្នុងសេចក្តីស្នេហាអាចបែកបាក់បរាជ័យ។ ដូច្នេះ ការរក្សាចិត្តស្ងប់ និងមានភាពអំណត់គ្រប់ពេលវេលាជាជំរើសដ៏ប្រសើរសម្រាប់អ្នក និងគ្រប់គ្រងភាពតានតឹងឲ្យមានតុល្យភាព កាលណាដែលអ្នកអាចសម្របខ្លួនបានទៅនឹងភាពតានតឹងឲ្យបានសមល្មមក្នុងសេចក្តីស្នេហានោះ អាចនាំឲ្យអ្នកអាចមានសមត្ថភាពក្នុងដោះស្រាយបញ្ហាដែលអ្នកជួបប្រទះ និងរក្សានូវសេចក្តីស្នេហារបស់អ្នកឲ្យបានយូរអង្វែងបាន។
២. កុំទំនើរចិត្តខ្លួនឯងពេក
សង្សារ ឬដៃគូស្នេហា គឺមិនមែនដូចជាមុខទំនិញលើទីផ្សារនោះឡើយថា អាចទិញដូរស្រេចតែនឹងចិត្តខ្លួនចង់ ឬពេលនឹកឃើញមិនពេញចិត្តក៏ចង់កែប្រែដៃគូឲ្យដូចខ្លួនចង់បាននោះទេ បើទោះជាទំនិញលើទីផ្សារក៏មានការទិញហើយមិនអាចដូរយកលុយវិញបានដែរណាមិត្តសម្រាញ់ទាំងអស់គ្នា។ ដូច្នេះហើយបើចង់កែប្រែដៃគូខ្លួន ត្រូវដឹងថាត្រូវកែប្រែខ្លួនឯងយ៉ាងម៉េចសិនទើបប្រសើរ។ បើមួយថ្ងៃៗយើងចេះតែគិតថាគេទើសដូច្នេះគេទើសដូច្នោះ ចង់តែឲ្យគេធ្វើដូច្នេះ ឬដូច្នោះតាមយើងគឺមិនល្អឡើយ។ ផ្ទុយមកវិញ បើយើងចេះកែលំអខ្លួន និងសម្របឲ្យដៃគូយើងយល់ពីចិត្តរបស់យើងវិញ ហើយឲ្យចេះយល់ចិត្តគ្នា និងចំណុចខ្វះខាតគ្នាទៅវិញទៅមកនោះ វានឹងធ្វើឲ្យសេចក្ុតីស្នេហារបស់យើងកាន់តែប្រសើរឡើង ទំនាក់ទំនងរវាងគ្នាក៏ល្អជាងមុនពីមួយថ្ងៃទៅមួយថ្ងៃផងដែរ។ ចូរចាំថា គ្រប់យ៉ាងគឺកើតចេញអំពីអ្នក…មានន័យថាជាបុគ្គលដែលជាគូស្នេហ៍ទាំងសងខាងនឹងឯង។
៣. ត្រូវទំនាក់ទំនងតាមទូរស័ព្ទ
ជាការពិតណាស់ នៅពេលដែលយើងនៅឆ្ងាយពីគ្នាមធ្យោបាយល្អបំផុតក្នុងការទំនាក់ទំនង និងថែរក្សាក្តីស្រលាញ់របស់យើងគឺតាមរយៈការនិយាយទូរស័ព្ទនេះឯង (បើគ្រាន់តែផ្ញើជាសារជាអក្សរខ្លីៗនោះគឺមិនយកជាការឡើយ)។ គូស្នេហ៍ ដែលមានការប្រាស្រ័យទាក់ទងគ្នាច្រើនតាមរយៈពាក្យសម្តី ឬការនិយាយស្តីច្រើននោះ គឺមានទំនាក់ទំនង និងមនោសញ្ចេតនារវាងគ្នាល្អប្រសើរជាងគូស្នេហ៍ ដែលកំរបានមានពេលនិយាយសារសងរកគ្នានោះតែម្តង។ ព្រោះថាការនិយាយស្តីវាចារទៅគ្នាទៅវិញទៅមកអាចឲ្យដៃគូកាន់តែស្គាល់អំពីខ្លួន ហើយធ្វើឲ្យមនោសញ្ចេតនាកាន់តែស៊ីជំរៅ បើទោះជាពេលខ្លះមានការទាស់ទែងគ្នាដោយសារពាក្យសម្ពីបន្តិចបន្តួចក៏ដោយ វាធ្វើឲ្យដៃគូស្នេហ៍មានភាពជឿជាក់ និងទុកចិត្តលើគ្នា ព្រមទាំងមានក្តីស្រលាញ់ចំពោះគ្នាបានកាន់តែប្រាកដចិត្តទៀតផង។
៤. ការស្រលាញ់ និងយកចិត្តទុកដាក់ថែរក្សាគ្នា
បើទោះជាយើងមានភាពមមាញឹកយ៉ាងណាក្តី ក៏ត្រូវចងចាំថាត្រូវចេះឆ្លៀតពេលវេលាមួយចំនួន ដើម្បីផ្តល់នូវក្តីស្រលាញ់ និងយកចិត្តទុកដាក់ថែរក្សាដៃគូរបស់យើងផង ម៉្យាងត្រូវចេះយល់ពីអារម្មណ៍របស់ដៃគូយើងថា គេគិតយ៉ាងណា និងចង់បានអ្វីផង ពិសេសគឺជួយកាត់បន្ថនូវភាពតានតឹង ឬសម្ពាធដែលគេមានមួយៗ និងតាមសម្រួល។ ព្រោះតាមការសិក្សាទៅលើដៃគូស្នេហាជាច្រើនបានឲ្យដឹងថា នៅពេលដែលមនុស្សម្នាក់បានឆ្លងកាត់នូវការងារ ឬបានបញ្ចប់ភារកិច្ចដ៏លំបាកមួយរួច ហើយស្រាប់តែត្រូវបានដៃគូស្នេហ៍របស់ខ្លួនមើលរំលង មិនយកចិត្តទុកដាក់ និងផ្តល់ក្តីស្រលាញ់ដល់ខ្លួនទៀតនោះ នាំឲ្យអត្រាបេះដូងរបស់គេកើនឡើងខ្ពស់ ហើយទទួលរងនូវភាពអវិជ្ជមានជាច្រើនលើផ្នែកស្មារតី។ ដូចនេះ ក្តីស្រលាញ់ និងយកចិត្តទុកដាក់ថែទាំរក្សារបស់យើងគឺសំខាន់ខ្លាំងណាស់សម្រាប់កាន់បន្ថយបញ្ហាទាំងនេះ ហើយធ្វើឲ្យមនោសញ្ចេតនា និងសេចក្តីស្រលាញ់របស់យើងកាន់តែល្អប្រសើរជាងមុនទៅទៀត។
៥. ការដោះស្រាយបញ្ហា
ពាក្យចាស់លោកតែងពោលថា «កុលាបតែងមានបន្លា រីឯងសេចក្តីស្នេហាតែងជួបប្រទះនូវឧបសគ្គ» ។ នៅលើវិថីស្នេហារបស់មនុស្សយើងម្នាក់ៗ គឺជារឿងធម្មតាដែលគង់តែនឹងកើតមានឡើងក្នុងជីវិតនោះទេ។ ដូច្នេះហើយ នៅពេលដែលសេចក្តីស្នេហា ឬមនោសញ្ចេតនារបស់យើងជួបប្រទះនៅបញ្ហា យើងគួរតែធ្វើការពិភាក្សារកដំណោះស្រាយជាមួយនិងដៃគូរបស់យើង ព្រោះថារឿងមនោសញ្ចេតនានេះ គឺជារឿងតែរវាងយើងទាំងពីរនាក់តែប៉ុណ្ណោះ ហើយក៏គ្មានជនទី៣ណាអាចចូលមកជួយយើងបានប្រសើរជាងខ្លួនយើងទាំងពីរនោះឡើយ។ បើយើងអាចរក្សាដូច្នេះបានល្អ វាក៏ជាជំនួយមួយដ៏ល្អទៅដល់មនោសញ្ចេតនាស្នេហារបស់យើងបានកាន់តែប្រសើរទៅទៀត។ ដូច្នេះ បើទោះជាទំនាក់ទំនងស្នេហារវាងយើងនិងដៃគូ មានអារម្មណ៍បញ្ហានិងគ្នាក៏ដោយ ត្រូវតែក្លាហានហ៊ាននិយាយចេញមក ហើយដោះស្រាយទាំងអស់គ្នា។
៦. ក្តីរំពឹងដែលយើងមានត្រូវតែឲ្យមានភាពប្រាកដប្រជា (ត្រូវមានការជឿជាក់ចំពោះគ្នានិងគ្នា)
ជំនឿចិត្តការរំពឹងជឿជាក់លើចំពោះដៃគូរបស់ខ្លួនថា ជាមនុស្សមានភាពរីកចម្រើន និងអភិវឌ្ឍន៍បានល្អ ហើយអាចធ្វើបានគ្រប់យ៉ាងទៅតាមការសន្យាជាគំនិតសុទិដ្ឋិនិយមដ៏ល្អប្រសើរមួយដែរ។ ក៏ប៉ុន្តែមិនត្រូវមានសុទិដ្ឋិនិយមជ្រុលពេលទៅលើអ្វីដែលមិនអាចទៅរួចនោះឲ្យសោះឡើយ។ ព្រោះយើង ឬដៃគូរបស់យើងពុំអាចធ្វើបានទេ នឹងនាំឲ្យយើងមានបញ្ហាធំ ហើយក៏អាចឈានដល់ការបែកបាក់មិនខាន។ លើសពីនេះ កី្តសង្ឃឹម ឬការរំពឹងដោយគ្មានភាពប្រាកដប្រជាទាំងនេះអាចធ្វើឲ្យដៃគូយើង ឬយើងខ្លួនឯងបាត់បោះការជឿជាក់ទៅវិញក៏ថាបាន។
៧. ការហ៊ាននិយាយបើកចំហអំពីបញ្ហាផ្លូវភេទជាមួយនិងដៃគូស្នេហារបស់ខ្លួន
ការហ៊ាននិយាយបើកចំហអំពីបញ្ហាផ្លូវភេទជាមួយនិងដៃគូស្នេហារបស់ខ្លួន គឺជាចំណុចមួយដែលសំខាន់សម្រាប់ជីវិតស្នេហារបស់មនុស្ស។ ព្រោះថាទំនាក់ទំនងស្នេហា និងមនោសញ្ចេតនារបស់មនុស្សនឹងត្រូវជួបប្រទះអំពីវាក្នុងការរស់នៅដ៏សាមញ្ញក្នុងជីវភាពរស់នៅរបស់យើង។ សេចក្តីក្លាយក្នុងការនិយាយអំពីបញ្ហានេះ នឹងជួយឲ្យមនោសញ្ចេញស្នេហារបស់យើងមានភាពប្រសើរ ហើយអាចជៀសវាងនឹងការយល់ច្រលំណាមួយដែលអាចនឹងកើតឡើងជាយថាហេតុបាន ហើយគូស្នេហ៍ទាំងពីរនឹងមានភាពពេញចិត្ត មិនថាទៅលើទំនាក់ទំនងមនោសញ្ចេតនាស្នេហា ឬបញ្ហាផ្លូវភេទឡើយ។ ជាទូទៅក្នុងចំណោមដៃគូស្នេហា ដែលមានទំនាក់ទំនងនិងគ្នារយៈពេលយូរកន្លងមកហើយនោះ មិនថានៅក្នុងសភាពទំនាក់ទំនងគ្នាជាលក្ខណៈធម្មតា ឬស៊ីជំរៅនោះទេ គឺតែងតែមានការទាក់ទងគ្នាយ៉ាងស្អិតល្មួតជាមួយនិងទំនាក់ទំនងផ្លូវភេទ។
