នារីៗយើងនៅពេលដែលកំពុងមានសេចក្តីស្នេហាជាមួយនិងមិត្តប្រុសរបស់ខ្លួន បើយើងមើលមិនដឹងអំពីចិត្តសាស្រ្តរបស់មិត្តប្រុសនោះទេ វាអាចនឹងធ្វើឲ្យយើងមានការយល់ច្រលំនិងគ្នាមិនខាន។ តើធ្វើដូចម្តេចទៅទើបយើងអាចសន្និដ្ឋាន ឬស្មានដឹងថាមានអ្វីដែលលាក់កំបាំងក្នុងចិត្តរបស់មិត្តប្រុសយើងនោះ? តទៅនេះគឺជាលក្ខណៈចិត្តសាស្រ្តមួយចំនួនរបស់នៅពេលតាមស្រលាញ់មនុស្ស ប្រសិនបើមានលក្ខណៈណាមួយដូចខាងក្រោមនេះ នោះនឹងបង្ហាញថាមានអ្វីនៅក្នុងចិត្តមិនខាន។
គិតពីផលប្រយោជន៍ផ្ទាល់ខ្លួន
បុរសប្រភេទនេះ នៅពេលដែលតាមស្រលាញ់ស្រី គឺតែងតែគិតអំពីប្រយោជន៍របស់ខ្លួនជាធំ ថាតើមានផលប្រយោជន៍អ្វីចំពោះខ្លួនឯងទៅថ្ងៃអនាគតឬអត់ ដោយយោងតាមលក្ខខណ្ឌបែបនេះឯងមានសម្រេចថាតើគួរតាមស្រលាញ់នារីម្នាក់ណា ឬមិនតាមម្នាក់ណានោះ។ ដូច្នេះហើយ នៅពេលដែលមិត្តស្រីរបស់គេនៅតែមានប្រយោជន៍សម្រាប់គេ គឺគេនៅតែស្រលាញ់អញ្ចឹងគ្មានថ្ងៃប្រែប្រួលឡើយ ក៏ប៉ុន្តែបើថ្ងៃណាមួយលក្ខខណ្ឌអត្ថិភាពនេះបាត់បង់ទៅហើយនោះ ឬក៏នាងមិនបានផ្តល់ផល ឬធ្វើឲ្យគេមិនបានសម្រេចនូវបំណងដែលប៉ងជាយូរមកហើយនោះ មុខជាគេកើតក្តីក្តៅក្រហាយខឹងសម្បា គិតថានាងមិនល្អចំពោះខ្លួនមិនខាន។
ការស្រមើស្រមៃខុសពីតក្កភាព
បុរសប្រភេទនេះ ជាទូទៅគឺពោរពេញទៅដោយភាពស្រមើស្រមៃ និងមានចិត្តសង្ស័យច្រើន។ បុរសប្រភេទនេះ ភាគច្រើនសង្កត់ធ្ងន់ចំពោះសេចក្តីស្នេហា ហើយយកស្នេហាជាធំក៏ពិតមែន ប៉ុន្តែការយល់ដឹងអំពីសេចក្តីស្នេហារបស់ខ្លួន គឺនៅមានកម្រិតនៅឡើយទេ ពិសេសមានប្រតិកម្មយ៉ាងខ្លាំងបំផុតចំពោះសកម្មភាពមិត្តស្រីរបស់ខ្លួន។ ឲ្យតែនៅខណៈណាដែលមិត្តស្រីរបស់ខ្លួនមានសកម្មភាពណាមិនប្រក្រតី ឬធ្វើនូវអ្វីដែលខ្លួនមិនយល់ មិនសប្បាយចិត្ត ឬមិនអាចទទួលស្គាល់បាន នោះគេនឹងកើតការស្រមើស្រមៃ មានការសង្ស័យចំពោះនាងភ្លាមតែម្តង គឺស្ថិតក្នុងភាពដាច់ខាតតែម្តងក្នុងការតាមសួរ ឬរកការពិតពីនាងឲ្យឃើញច្បាស់ថាតើ គេហើយនិងនាងមានចំណុចណាដែលមិនត្រូវគ្នា ហើយបង្កឲ្យមានបញ្ហាដូចនេះកើតឡើងនោះ។
គ្មានមនោសញ្ចេតនាក្នុងចិត្ត
បុរសប្រភេទនេះជាទូទៅគឺវាយតម្លៃ និងពិចារណាលើហេតុផលចំពោះមិត្តស្រីរបស់ខ្លួន នៅពេលប្រឈមមុខចំពោះមិត្តស្រីខ្លួន គឺគ្មានមនោសញ្ចេតនា ឬក្តីអាណិតនោះទេ គឺមានតែការពិចារណាលើហេតុហើយនិងផលប៉ុណ្ណោះឯង។ ពិសេសគឺនៅពេលដែលមិត្តត្រូវការក្តីស្រលាញ់ លួងលោម ក្តីអាណិត និងមនោសញ្ចេតនាពីគេនោះ គឺពុំដែលទទួលបានឡើយ គឺមានតែទុកគ្នាចោលឲ្យនៅសោកសៅតែម្នាក់ឯងប៉ុណ្ណោះ។ គឺជាប្រភេទបុរស ដែលនៅសប្បាយរីករាយជាមួយនិងមិត្តស្រី តែមិននៅគាំទ្រមិត្តស្រីពេលគ្រាលំបាកទេ ពោលគឺរួមតែសុខនិងគ្នាប៉ុន្តែមិនរួមទុកនិងមិត្តស្រីឡើយ។
កំហុកបញ្ច្រាសទិសក្នុងចិត្ត
បុរសប្រភេទនេះ ជាទូទៅចូលចិត្តយកចំណុចខ្លាំងរបស់ខ្លួនឯងទៅប្រៀបធៀបជាមួយនិងចំណុចខ្សោយរបស់មិត្តស្រី ឬក៏យកចំណុចមិនល្អរបស់មិត្តស្រីមកប្រៀបធៀបជាមួយនិងចំណុចល្អរបស់ខ្លួន។ បុរសប្រភេទនេះ នៅពេលដែលចាប់ផ្តើមសេពគប់ជាមួយនិងមិត្តស្រីភ្លាមគឺឆាប់ចាប់បានចំណុចល្អៗរបស់មិត្តស្រី ហើយសរសើរនិងពេញចិត្តនូវចំណុចល្អរបស់មិត្តស្រីខ្លួនខ្លាំងណាស់ ដែលធ្វើឲ្យសេចក្តីស្នេហារបស់ពួកគេកាន់តែឡើងកំដៅឡើងៗ។ ហើយនៅពេលដែលគេចាប់ផ្តើមសង្កេតឃើញថានាងមានចំណុចណាមួយមិនដល់គេភ្លាមនោះ គឺភាពសោះកក្រោះរបស់គេចំពោះនាងនឹងកើតមានឡើងភ្លាមតែម្តង។ ហើយដែលភាពសោះកក្រោះរបស់គេចំពោះនាងនេះឯង ធ្វើឲ្យនាងកាន់តែមានភាពច្របូកច្របល់រកស្មានចិត្តគេមិនត្រូវ ហើយធ្វើឲ្យនាងកាន់តែមិនច្បាស់ពីគេ និងធ្វើឲ្យនាងកាន់តែគិតថាគេកាន់តែមានភាពអាថ៌កំបាំងទៅហើយ។
ចិត្តប្រតិកម្មត្រលប់
បុរសប្រភេទនេះជាទូទៅចូលចិត្តភាពទាន់សម័យ និងមានអារម្មណ៍ប្រតិកម្មឆាប់រហ័ស រហ័សរហួន ប៉ុន្តែខ្វះខាតនូវចិត្តម្ចាស់ការ និងជំនឿជាក់ចំពោះខ្លួនឯង។ ទាំងចិត្តគំនិត គឺឆាប់ទទួលឥទ្ធិពលពីការប្រែប្រួលតាមសម័យនៃមជ្ឈដ្ឋានខាងក្រៅ នឹងធ្វើការផ្លាស់ប្តូរទៅតាមមជ្ឈដ្ឋាននោះ ពិសេសគឺចូលចិត្ត និងស្រលាញ់នារីដែលទាន់សម័យ។ បុរសប្រភេទនេះ គឺយកចិត្តទុកដាក់ខ្ពស់ចំពោះរូបរាងខាងក្រៅរបស់មិត្តស្រីខ្លួន ទាំងរូបសម្បត្តិ ការតុបតែងខ្លួន សំលៀកបំពាក់ទាន់សម័យ ម៉ូតសក់ ខោអាវជាដើម។ ហើយចំពោះរឿងទាំងនេះ គឺគេពេញចិត្ត និងគាំទ្រទាំងស្រុងឲ្យមិត្តស្រីរបស់ខ្លួនតែងខ្លួនដូច្នេះណាស់។ ប៉ុន្តែនៅពេលដែលគេប្រទះឃើញថា មិត្តស្រីរបស់ខ្លួនមានលក្ខណសម្បត្តិខុសពីអ្វីដែលខ្លួនរំពឹងប្រាថ្នាចង់បាននោះ គេពិតជាមានភាពខកចិត្តជាខ្លាំងមិនខាន។
តើមិត្តនារីៗយើងគួរធ្វើដូចម្តេចនៅពេលដែលជួបប្រទះនិងលក្ខណៈមិត្តប្រុសរបស់ខ្លួនដូចខានលើនោះ? សូមកុំទាន់អាលមានការភិតភ័យអ្វីទាំងអស់ ចំពោះប្រភេទលក្ខណៈទាំងឡាយខាងលើនេះឲ្យសោះ។ ប្រសិនបើ មិត្តនារីៗយើងជួបប្រទះនូវបញ្ហាដូចខាងលើនេះ ប្រាកដណាស់មិនថាតិចឬច្រើនគង់តែនឹងអាចមានមិនខាន ប៉ុន្តែក៏មិនមែនព្រោះតែបែបនេះ ក៏ប្រញាប់សុំបែងចែកផ្លូវគ្នាឲ្យដាច់នោះដែរ បើយើងធ្វើដូច្នេះមែន មុខជាគ្មានថ្ងៃរកបានបុរសជាទីគាប់ចិត្តសម្រាប់យើងឡើយ។ ក៏ប៉ុន្តែមុននឹងចាត់វិធានការនឹងបញ្ហាទាំងនេះ ចំពោះមិត្តនារីៗយើងត្រូវប្រាកដឲ្យច្បាស់សិនថាខ្លួនពិតជាស្រលាញ់គេមែនជាអត់? បើយើងពិតជាស្រលាញ់គេពិតមែន មិនខ្លានអ្វីនឹងហាមាត់និយាយជាមួយនិងគេតាមត្រង់នោះទេ ថាយើងបានប្រទះឃើញនូវចិត្តលាក់កំបាំងរបស់គេមួយនេះ ហើយមករកវិធានការជាមួយគ្នា ដើម្បីឲ្យគេដឹងច្បាស់ពីចិត្តរបស់គេខ្លួនឯងផង (ជួនកាលគេមិនដឹងពីចិត្តរបស់ខ្លួនឯងច្បាស់ផង) និងចៀសវាងការភាន់ច្រលំណាមួយកើតឡើង។ បើទោះជាយើងទើបតែចាប់ផ្តើមស្រលាញ់គ្នា មនោសញ្ចេតនាមិនទាន់ជ្រាលជ្រៅក៏ដោយ ក៏អាចនិយាយដោយចំហរពីចិត្តរបស់ខ្លួនបានដែរ។ ប៉ុន្តែបើយើងគិតថាវាមិនចាំបាច់នោះទេ ហើយមិនអាចទ្រាំរស់នៅជាមួយគ្នាទាំងបែបនេះនោះ ក៏អាចពិចារណាបែកគ្នាឲ្យបានឆាប់ទាន់មុនអ្វីៗ (មនោសញ្ចេតនា និងស្នេហា) បានកើតឡើងជ្រុលនោះ។ មិនថាយើងជ្រើសរើសយកមធ្យោបាយបែបណាមកដោះស្រាយទេ ចូរចាំថាត្រូវមានការជឿជាក់បន្តិច និងមានការសន្និដ្នានឲ្យប្រាកដថាវាជាការពិតទាំងស្រុងឬទេ? ពុំដូច្នោះទេ ក្រែងតែយើងគិតស្មានតែខ្លួនឯងដោយគ្មានមូលដ្ឋានបញ្ជាក់បានត្រឹមត្រូវ និងច្បាស់លាស់នោះ វានឹងធ្វើឲ្យយើងស្តាយក្រោយមិនខាននៅពេលខាងមុខ។
