មានមនុស្សស្រីជាច្រើនបានឆ្ងល់ដូចនេះថា៖ «មាត់មនុស្សប្រុសនេះចូលចិត្តនិយាយសម្តីអាសអាភាសលេងសើចយ៉ាងចឹង?»
បើយើងសន្និដ្ឋានទាំងស្រុងថា មនុស្សប្រុសគឺមានសារជាតិអាក្រក់បែបនេះពីកំណើតនោះ វាពិតជាអស់អីនឹងនិយាយហើយ។ ក៏ប៉ុន្តែយើងអាចនាំគ្នាសាកល្បងពិចារណាអំពីចិត្តសាស្ត្ររបស់មនុស្សប្រុស ដែលចូលចិត្តនិយាយសម្តីអាសអាភាសនេះទៅមើលថាតើវាយ៉ាងណាទៅវិញ។
ចំណុចដំបូងនេះ គឺមានបុរសមួយចំនួនដោយសារទំនេរគ្មានអ្វីធ្វើក៏ចេះតែហាមាត់និយាយគ្នាតែផ្តេសផ្តាសអញ្ចឹងទៅ ដើម្បីកំដរពេលវេលាលេងទុកជាការកម្សាន្តប៉ុណ្ណោះឯង។ ប្រសិនបើមនុស្សប្រុសៗជួបគ្នានិយាយលេងសើចដោយសម្តីអាសអាភាសស្ថិតក្នុងស្ថានភាពមួយដែលគ្មានគោលបំណងអ្វីមួយនោះ គឺបង្ហាញយ៉ាងច្បាស់ថាមនុស្សប្រុសទាំងនោះចែកដាច់គ្នារវាងរឿងអាសអាភាស និងការងារបានច្បាស់លាស់ណាស់។ រឿងអាសអាភាសគឺរឿងអាសអាភាស ហើយរឿងការងារគឺជារឿងការងារមិនអាចយកមកលាយឡំចូលគ្នាបានឡើយ។ ហើយអាចនិយាយបានថា ដោយសារការងារធ្វើឲ្យមនុស្សប្រុសមានភាពសោះកក្រោះពេក គ្មានឱជារស មានភាពនឿយហត់ខ្លាំង និងមានទំនាក់ទំនងតានតឹងខ្លាំងជាដើម ដើម្បីកាត់បន្ថយភាពតានតឹង និងបង្កបរិយាកាសឲ្យមានភាពធូរស្រាលសម្រាប់លួងលោមចិត្តខ្លួនឯង ទើបធូរដង្ហើមបានបន្តិត។
ចំណុចទី២ គឺនៅពេលកម្មពិធីជួបជុំ ជប់លៀង ឬផឹកស៊ី ការនិយាយកំប្លែងបែបអាសអាភាសដូចនេះ ដើម្បីចូលរួមបង្កបរិយាកាសឲ្យកាន់តែមានភាពសប្បាយរីករាយទៅទៀត។ ពេលពុំទាន់បានផឹកគឺមានឥរិយាបទជាសុភាពបុរស ប៉ុន្តែក្រោយពេលស្រាចូលពោះបានពីរបីកែវបន្ទាប់មកហើយនោះ គឺសម្ពីកំប្លែងៗបែបអាសអាភាសចាប់ផ្តើមចេញមកជាបន្តបន្ទាប់គ្នាមិនខាន។ នៅពេលដែលមនុស្សប្រុសជប់លៀងផឹកស៊ីបែបនេះ បើគេនាំគ្នានិយាយរឿងត្រឹមត្រូវទាំងអស់នោះ គឺពិតជារឿងមួយដ៏ចំឡែកមិនខាន ហើយក៏មិនអាចបន្តកម្មវិធីបានយូរនោះដែរ។ បើដូច្នេះមែន តើមនុស្សប្រុសអាចនិយាយលេងរឿងអ្វីបានខ្លះទៅ ដើម្បីឲ្យសប្បាយ និងធ្វើឲ្យគេទាំងអស់គ្នាចាប់អារម្មណ៍ ហើយបន្តផឹកជាមួយគ្នាបានកាន់តែយូរទៀតនោះ? នោះគឺគ្មានអ្វីក្រៅអំពីរឿងកំប្លែង ឬសម្តីអាសអាភាស ដែលមនុស្សស្រីមិនចង់ស្តាប់នោះទេ។
និយាយឲ្យចំទៅទំនាក់ទំនងសង្គមរបស់មនុស្សប្រុសភាគច្រើនដែលពាក់ព័ន្ធក្នុងការនិយាយកំប្លែង ឬរឿងបែបនេះ គឺពិតជាក្នុងនោះអាចមានការសន្និដ្ឋានពីរ។ ទីមួយ គឺអាចជាមនុស្សប្រុសដែលមានបទពិសោធន៍ច្រើនក្នុងរឿងហ្នឹង គេនិយាយចេញមកក្នុងគោលបំណងពីរ មួយគឺបង្ហាញថាខ្លួនឯងខ្លាំង ជើងចាស់ក្នុងរឿងហ្នឹង ឲ្យអ្នកផ្សេងទៀតសរសើរថាខ្លួនអស្ចារ្យ មួយទៀតគឺនិយាយដើម្បីរំលឹកពេលវេលាដែលខ្លួនសប្បាយៗពីមុនមកនោះ។ តាមពិតទៅរឿងបែបៗនេះ មនុស្សប្រុសគួរតែដឹងក្នុងចិត្តទៅបានហើយ មិនចាំបាច់និយាយចេញមកឲ្យគេផ្សេងដឹងធ្វើអ្វីទេ ប៉ុន្តែនៅតែនិយាយទៅបាន នេះហើយដែលធ្វើឲ្យមនុស្សស្រីពិបាកនឹងយល់នោះ។ ប៉ុន្តែនៅក្នុងពិភពរបស់មនុស្សប្រុស រវាងមនុស្សប្រុង និងមនុស្សប្រុសគ្នាឯង មិនថារឿងអាសអាភាស ឬរឿងអ្វីមួយនោះឡើយ ឲ្យតែខ្លួនបានដឹងច្រើនជាងគេ មានបទពិសោកធន៍ច្រើនជាងគេ គឺងាយនឹងចែករំលែកឲ្យអ្នកដទៃបានដឹងខ្លាំងណាស់ ហើយក៏មានការទទួលស្គាល់ពីមនុស្សប្រុសដូចគ្នាទៀតផង។ ទីពីរនោះគឺ ចំពោះអ្នកដែលគ្មានបទពិសោធន៍ក្នុងរឿងបែបហ្នឹងទេ ប៉ុន្តែខ្លាចខ្មាស់គេ មិនចង់ឲ្យគេថាជា «មាន់ថ្មី» ក៏និយាយបន្លំគេឲ្យដូចមែនទែនទៅ ដើម្បីបង្ហាញគេថាខ្លួនក៏មិនអនដែរ។ តាមពិតទៅបើយើងមិនធ្លាប់ ឬមិនដឹងទេ អាចនៅឲ្យស្ងៀមចាំតែស្តាប់ពីគេទៅអត់ទេ គឺចេះតែនិយាយចូលទៅដល់សាច់រឿងគេដែរ ហើយប្រឌិតរឿងបំភ្លើសគេទៀតផងក៏មាន ដើម្បីតែចូលរួមការអ៊ូអរប៉ុណ្ណោះ។
ប្រសិនបើមនុស្សប្រុសនៅជំវិញអ្នក មិត្តភិក្ត ឬមិនរួមការងារមានមនុស្សប្រុសដែលចូលចិត្តនិយាយបែបនេះនោះ ក៏កុំទាន់អាលសន្និដ្ឋានគេទាំងស្រុងថាអាក្រក់ថោកទាបអី។ នៅពេលខ្លះសម្តីទាំងនោះអាសអាភាសបន្តិចបន្តួច ប៉ុន្តែមានភាពកំប្លែងខ្លាំង ក៏អាចលួងឲ្យមនុស្សស្រីសប្បាយរីករាយផងដែរ ពេលនោះឯងមនុស្សស្រីប្រហែលជាមិនប្រកាន់ លើកលែងឲ្យអ្នកម្តងចុះមើលទៅ។ ក៏មានមនុស្សប្រុសខ្លះទៀតក្បាលខូច នៅពេលឃើញមានមនុស្សស្រីមកដល់ ស្រាប់តែមានចេតនានិយាយសម្តីអាសអាភាសឲ្យគេឮ ធ្វើឲ្យមនុស្សស្រីមិនស្រួលត្រចៀតសោះ ការដែលគេធ្វើដូច្នេះ គឺគ្មានអ្វីក្រៅពីចង់លចិត្តរបស់មនុស្សស្រីមើលនោះឡើយ ថាតើនាងនឹងមានប្រតិកម្មយ៉ាងណាដែលក្រោយបានស្តាប់ឮរឿងបែបនេះ។ ហើយចំពោះមនុស្សប្រុស ដែលស្ថិតក្នុងស្ថានភាពបែបនេះ គឺច្រើនតែចង់ឲ្យមនុស្សស្រីចាប់អារម្មណ៍និងខ្លួនប៉ុណ្ណោះ ព្រោះគេមិនហ៊ានតាមទាក់ទងគេដោយចំហ ឬយល់ថាខ្លួនគ្មានការជឿជាក់ទាំងស្រុង ក៏ជ្រើសរើសយកមធ្យោបាយនេះក្នុងការទាក់ទង។ ដូចនេះ នៅពេលដែលមនុស្សស្រីប្រតិកម្មតបវិញនោះ ក៏មានន័យថាអាចងាយនឹងចូលក្នុងអន្ទាក់របស់គេមិនខាន។ បើមនុស្សស្រីពិតជាមានប្រតិកម្មអិមអៀន ហើយបន្តនៅស្ងៀមស្តាប់គេបន្តទៀតទាំងខ្មាសអៀននោះ គឺពិតជានឹងត្រូវចាញ់ល្បិចប្រុសៗទាំងនោះមិនខាន ។
តើមិត្តនារីៗយើងគួរធ្វើដូចម្តេចទៅនៅពេលជួបប្រទះនឹងបញ្ហា ឬស្ថានភាពដូចនេះ? វាពិតជាការងាយស្រួលណាស់សម្រាប់មនុស្សស្រីឆ្លាតៗទាំងអស់គ្នា គឺធ្វើដូចជាមិនអើពើនឹងសម្តីដ៏អាសអាភាសរបស់ពួកប្រុសដែលបាននិយាយនោះទៅវាជាការស្រេចទៅហើយ។ បើយើងថាធ្វើដូច្នេះ និយាយទៅវាងាយស្រួលនោះទេ ប៉ុន្តែធ្វើទៅមានការពិបាកណាស់ ចំពោះក្មេងស្រីនារីៗយើងឲ្យទៅធ្វើមិនដឹងមិនឭនឹងសម្តីអាសអាភាស ដែលគេនិយាយមានចេតនាដាក់យើងម៉េចនឹងងាយស្រួលយ៉ាងនេះនោះ។ យើងអាចសាកវិធីម្យ៉ាងទៀតក៏បានដោយសាកល្បងនិយាយទៅកាន់ពួកគេថា៖ «ណែ៎! លោកម្នាក់នេះ ឬម្នាក់នេះ មើលទៅការងារ ឬការសិក្សាគ្រាន់បើនឹងគេឯងដែរ ម៉េចក៏សម្តីចេញមកទាំងអាចន៍ (ឬអាសអាភាស) យ៉ាងនេះ ពិតជាធ្វើឲ្យខូចរូបរាងគេឯងក្នុងសង្គម (ឬខូចពូជគេអ្នកជាអស់ហើយ) មែន។ »
នៅពេលដែលយើងនិយាយសម្តីយ៉ាងនេះទៅកាន់គេវិញ ធ្វើឲ្យអ្នកនិយាយសម្តីអាសអាភាសទាំងនេះ ពិតជាទទួលបានការប្រមាន និងរាងចាលមិនខាន។ យ៉ាងហោចណាស់ក៏ធ្វើឲ្យគេឆ្អែតចិត្តលើកក្រោយលែងហ៊ានមានបំណងអាក្រក់ប៉ុនប៉ងអ្វីមកលើយើងទៀតហើយ។
