«៥មិន» ជាចំណុចដែលអ្នកគួរតែហ៊ានផ្លាស់ប្ដូរដើម្បីជោគជ័យ មិនថាអ្នកគឺជាថៅកែ គឺជាម្នាស់អាជីវកម្ម បើកហាង បើកបាខារ៉ាអូខេ រោងចក្រ ឬផ្នែកសេវាកម្ម ។ល។ មិនថាអ្នកប្រកបរបរ ឬអាជីពផ្នែកណាទេ បើអានអត្ថបទនេះយល់ហើយ គឺស្មើនឹងអ្នកបានរៀនចប់ថ្នាក់អនុបណ្ដិត (MBA) អញ្ចឹងដែរ។
១. មិនមានចិត្តអំណត់
ការមិនមានចិត្តអំណត់ គឺជាអាចបណ្ដាលឱ្យអ្នកមានភាពតក់ក្រហល់ ឆាប់ចង់ឃើញចង់បានលទ្ធផលភ្លាមៗ (ជួលកាលមកពិចិត្តចង់ឈ្នះខ្លាំងផង)។ អ្វីទាំងនេះ សុទ្ធតែកើតចេញពី ការចង់បានខ្លាំង តែឆាប់ចុះញ៉មនឹងឧបសគ្គ ហើយក៏ជំរុញឱ្យមនុស្សយើងពេលខ្លះបោះបង់នូវឱកាសក្នុងការទទួលបានជោគជ័យ ដែលត្រូវការសេចក្ដីព្យាយាម និងតស៊ូបន្ដិច បែរជាទៅជ្រើសរើសយកការទាក់ទាញពីមជ្ឈដ្នានខាងក្រៅ ធ្វើឱ្យខ្លួនខ្វះចិត្តអំណត់ និងតក់ក្រហល់ចង់ឆាប់បានឆាប់ឈ្នះ ប៉ុន្ដែ ផ្ទុយស្រឡះបែរជាពុំទទួលបានអ្វីទាំងអស់ទៅវិញ។
ក្នុងជីវិតរស់នៅប្រចាំថ្ងៃរបស់មនុស្សម្នាក់ៗ បើយើងចង់ទទួលបាននូវអ្វីមួយ នោះយើងត្រូវតែរៀនលះបង់វាជាមុនសិន មានន័យថាយើងត្រូវចេះយកលុយទៅវិនិយោគ ចំណាយ ឬប្រើប្រាស់ដើម្បីចំណេញលុយមកវិញ។ ពិតប្រាកដណាស់ប្រសិនបើយើងផ្តល់ការលះបង់ទៅលើអ្វីមួយហើយយើងនឹងអាចទទួលបាននូវអ្វីៗជាច្រើនពីការលះបង់នោះបានកាន់តែច្រើន បីដូចជាយើងសាបព្រោះដើម្បីដាំដំណាំអញ្ចឹង ពុំត្រូវតក់ក្រហល់ពេកនោះទេ ទើបទទួលបានជោគជ័យ បើទោះត្រូវចំណាយពេលបន្ដិច ក៏មានតម្លៃដែរ។ ដូចនេះ ការរក្សាភាពអំណត់ដោយ កុំតក់ក្រហល់ចង់ឆាប់ទទួលបានផលភ្លាមៗពេក អាចជួយឱ្យជីវិតយើងមានការផ្លាស់ប្ដូរប្រសើរជាងនេះ ។
២. មិនចេះលត់ដំខ្លួន
ចំណុចមិនទី២ គឺមានមនុស្សជាច្រើនធ្វើពុំបាន ឬមិនចេះធ្វើការលត់ដំខ្លួននេះតែម្ដង ការលត់ដំនេះ ក៏អាចនិយាយបានថាជាការដាក់វិន័យសម្រាប់ខ្លួនឯងផងដែរ ប៉ុន្ដែវិន័យទាំងនេះបានជំរុញក្នុងការបង្កើតទម្លាប់ឱ្យបានប្រសើរក្នុងជីវិត និងដើម្បីភាពជោគជ័យដែលយើងតែងតែប្រាថ្នាចង់បាននោះ ។ ជាមួយនឹង «ទម្លាប់ដ៏ធម្មតាទាំង៧ បង្កើតអឆ្ឆរិយភាពនៃការលត់ដំខ្លួន » របស់លោក ប្រាយអាន ត្រាស៊ី (Brian Tracy) គ្រូបង្វឺកជំនាញទន់ដ៏ចំណានក្នុងសហរដ្ឋអាមេរិក ក៏ជាឧទាហរណ៍គំរូមួយគួរយើងយកមកស្វែងយល់ដើម្បីបង្កើតនូវអឆ្ឆរិយភាពដ៏អស្ចារ្យក្នុងជីវិតយើងផងដែរ។ ដូចនេះ មិត្តអ្នកអានទាំងអស់អាចចាប់ផ្ដើមស្វែងយល់ពី ៣ ចំណុចជាមូលហេតុនាំឱ្យអ្នកមិនចេះលត់ដំខ្លួន ដើម្បីរៀនចេះរៀបចំខ្លួន និងលត់ដំខ្លួនឱ្យបានកាន់តែប្រសើរឆ្ពោះទៅកាន់ភាពជោគជ័យ។
៣. មិនចេះគ្រប់គ្រងអារម្មណ៍
អារម្មណ៍ដូចស្រមោលអន្ទោលតាមប្រាណនៃជីវិត និងសុខភាពមនុស្សម្នាក់ៗ មានមនុស្សភាគតិចណាស់ ដែលអាចគ្រប់គ្រងបានល្អណាស់ មិនថាល្អ ឬមិនល្អក្ដី ការឆាប់ទទួលឥទ្ធិពលពីអារម្មណ៍អាចផ្ដល់ផលអវិជ្ជមាន ឬផលប៉ះពាល់ដល់ការឈានទៅរកភាពជោគជ័យក្នុងជីវិត។បើយើងគ្រប់គ្រងអារម្មណ៍ខ្លួនឯងបានល្អ អាចជួយផ្តល់កម្លាំង និងថាមពលដល់យើងបានច្រើន ដែលជាហេតុនាំឱ្យជាអារម្មណ៍ជាកត្តាដំបូងគេក្នុងភាពជោគជ័យនេះ ព្រោះមនុស្សដែលមានសុខភាពល្អ មាំមួនយ៉ាងណាក្តី នៅពេលដែលគាត់មានអារម្មណ៍មិនល្អក៏អាចជះឥទ្ធិពលខ្លាំងដល់សុខភាព ហើយយើងមិនគួរណាព្រោះតែរឿងបន្តិចបន្តួចនៅក្នុងការរស់នៅក៏ឆោឡោនៅមិនសុខក្នុងខ្លួនទេ ដែលនាំតែមានការលំបាកដល់ខ្លួនឯង ថែមទាំងផ្ដល់ផលប៉ះពាល់ដល់សុខភាពទាំងផង។
បើយើងគ្រប់គ្រងអារម្មណ៍ខ្លួនឯងបានល្អ ដើម្បីជួយផ្តល់កម្លាំង និងថាមពលដល់យើងបានច្រើន ដូច្នេះ មិត្តអ្នកអានទាំងអស់អាចសាកល្បងអនុវត្តវិធីសាស្រ្ដ ៣មិន និង៣ត្រូវ ដើម្បីគ្រប់គ្រងឥទ្ធិពលមិនល្អពីអារម្មណ៍ ដែលខ្ញុំបានរៀបរាប់ក្នុងអត្ថបទមុននេះបាន។
៤. មិនស្ដាប់យោបល់អ្នកដទៃ (ក្រអឺតក្រទម)
ការមិនស្ដាប់យោបល់អ្នកដទៃ ជាចំណុចខ្វះខាតដែលមនុស្សគ្រប់គ្នាតែងតែមាន ពិសេសេចំពោះអ្នកប្រកាន់ភ្ជាប់នូវផ្នត់គំនិតថា «មិនព្រមខំរៀនសូត្រពីគេ ចេះតែគិតថាខ្លួនត្រូវជានិច្ច ហើយមិនចេះរក្សាចិត្តគំនិតដោយចាប់ផ្តើមពីសូន្យទៅសោះ» ដែលយើងគ្រប់គ្នាគួរគិតពិចារណាឡើងវិញ ដោយសារយើងគ្រប់គ្នាជាមនុស្សចេះរៀនសូត្រ និងចេះគិតគូពិចារណា។ ដើម្បីកាត់បន្ថយភាពក្រអឺតក្រទម និងចេះស្ដាប់យោបល់អ្នកដទៃឱ្យបានច្រើននោះ ការរៀនចេះដាក់ខ្លួន ទទួលយកគំនិត និងរៀនសូត្រពីអ្នកដទៃ ពិសេសការតាំងចិត្តរៀនសូត្រពីចំណុចសូន្យឡើងវិញ។
៥. មិនហ៊ានទទួលយកការផ្លាស់ប្ដូរ
ធម្មតាដើម្បីរីកចម្រើនទៅមុខ ការសាកល្បង និងការកែសម្រួលឱ្យបានត្រឹមត្រូវតាមទិសដៅការអភិវឌ្ឍន៍ ជារឿងដែលចាំបាច់បំផុតត្រូវធ្វើ មិនថាក្នុងន័យជាបុគ្គល ឬជាក្រុមឡើយ។ ចំពោះការលូតលាស់ពីចំណុចមួយទៅចំណុចមួយ រមែងមានការផ្លាស់ប្ដូរជានិច្ច ប៉ុន្ដែអ្នកអាចមើលមិនឃើញ ឬប្រមាទ និងខ្លាចមិនហ៊ានធ្វើការផ្លាស់ប្ដូរ ដោយសារការផ្លាស់ប្ដូរពិតជាសំខាន់សម្រាប់ការរីកចម្រើនមែនពិតក្ដី ក៏មានការប្រឈមមុខនឹងហនីភ័យខ្ពស់ដែរ។ ដូចនេះ អ្នកដែលសំឡឹងមើលពុំបានវែងឆ្ងាយ ខ្លាចតែបង់ខាតប្រយោជន៍ចំពោះមុខ អាចនឹងខ្លាច ហើយក៏ពុំហ៊ានទទួលយកការផ្លាសប្ដូរជាការពិតជាស្ដែងផងដែរ។
ប្រសិនបើយើងជាអ្នកកាន់ការងារធំ ឬជាអ្នកដឹកនាំដ៏ពូកែម្នាក់នោះ យើងពិតជាមានវិធីក្នុងការរៀបចំការផ្លាស់ប្ដូររបស់ខ្លួនឱ្យស្របទៅតាមចក្ខុវិស័យដ៏វែងឆ្ងាយរបស់ខ្លួនពុំខាន ហើយក៏ពុំខ្លាចការផ្លាស់ប្ដូរថានឹងនាំផលប៉ះពាល់ដល់ខ្លួនដែរ។ ដោយឡែកចំពោះសាមញ្ញជនធម្មតាដូចជាយើងវិញ ពុំមែនថាធ្វើត្រូវធ្វើតាម ឬក៏ថាយើងធ្វើពុំបានដូចគេទេ ប៉ុន្ដែយើងត្រូវរៀនហ៊ានទទួលយកការផ្លាស់ប្ដូរ និងបង្កើតការផ្លាស់ប្ដូរឆ្ពោះទៅរកគោលដៅជីវិតយើង ហើយឱ្យកាន់តែប្រសើរឡើង។
ដោយសេចក្ដីអត្ថធិប្បាយក្នុងអត្ថបទនេះ មានច្រើនចំណុចខ្ញុំពុំអាចបកស្រាយបានក្បោះក្បាយឡើយ ប្រសិនជាចាប់អារម្មណ៍ចង់ស្វែងយល់ឱ្យជាក់ច្បាស់ជាងនេះទៀតនោះ សូមមិត្តអ្នកទាំងអស់ ចុចចូលអានទៅតាមចំណុចនីមួយៗ ដែលខ្ញុំបានដាក់តំណភ្ជាប់ទៅកាន់អត្ថបទបកស្រាយពីខ្លឹមសារលម្អិតនៃចំណុចនីមួយៗនោះ។
សរុបសេចក្ដីមកវិញ ចំណុចដែលអ្នកគួរតែហ៊ានផ្លាស់ប្ដូរដើម្បីជោគជ័យ ដោយជំនះផ្នត់គំនិត និងឥរិយាបថ «៥មិន» នេះ មិនថាអ្នកគឺជាថៅកែ គឺជាម្នាស់អាជីវកម្ម បើកហាង បើកបាខារ៉ាអូខេ រោងចក្រ ឬផ្នែកសេវាកម្ម ។ល។ មិនថាអ្នកប្រកបរបរ ឬអាជីពផ្នែកណាទេ គឺស្មើនឹងអ្នកទទួលបាន អាវុធដ៏ពិសិដ្ឋ សម្រាប់ជំរះរាល់ឧបសគ្គ ដែលនឹងរារាំងដំណើរជីវិតដ៏ប្រសើររបស់អ្នក ហើយជំរុញឱ្យអ្នកកាន់ឆាប់ទទួលបានជោគជ័យ និងសម្រេចនូវបំណងប្រាថ្នាដែលបានផ្សងជាយូរមកហើយនោះ។
