តើអ្នកជាបុគ្គល ដែលតែងតែទទួលឥទ្ធិពលពីអារម្មណ៍របស់អ្នកមែនទេ? មិនថាល្អ ឬមិនល្អីក្ដី ការឆាប់ទទួលឥទ្ធិពលពីអារម្មណ៍អាចផ្ដល់ផលអវិជ្ជមាន ឬផលប៉ះពាល់ដល់ការឈានទៅរកភាពជោគជ័យក្នុងជីវិត។ ដូចគ្នាទៅនឹងការវាយតម្លៃចំពោះបុគ្គលជោគជ័យ ដោយផ្អែកលើកត្តាមួយចំនួន ក៏ជាការសន្និដ្ឋានថាតើ មនុស្សម្នាក់ជាបុគ្គលមានភាពជោគជ័យ ឬគ្មានត្រូវពិនិត្យលើចំណុចទាំងប្រាំនេះ៖ (១). ចេះគ្រប់គ្រងអារម្មណ៍ខ្លួនឯងឬអត់? (២). មានសុខភាពមាំមួនឬទេ? (៣). មានទំនាក់ទំនងល្អជាមួយអ្នកដទៃឬទេ? (៤). ចេះគ្រប់គ្រងពេលវេលាបានល្អឬអត់? (៥). ចេះចាត់ចែងលុយកាក់បានល្អឬទេ?
ហេតុអ្វីបានជាអារម្មណ៍ជាកត្តាដំបូងគេក្នុងភាពជោគជ័យនេះ ព្រោះមនុស្សដែលមានសុខភាពល្អ មាំមួនយ៉ាងណាក្តី នៅពេលដែលគាត់មានអារម្មណ៍មិនល្អក៏អាចជះឥទ្ធិពលខ្លាំងដល់សុខភាពដែរ។ មកទល់សម័យបច្ចុប្បន្នកត្តាដែលជំរុញឲ្យមនុស្សជោគជ័យគឺ២០%ពឹងផ្អែកលើប្រាជ្ញា រីឯ៨០%ភាគទៀតទទួលឥទ្ធិពលពីអារម្មណ៍ ដូច្នេះបើយើងគ្រប់គ្រងអារម្មណ៍ខ្លួនឯងបានល្អ វាអាចជួយផ្តល់កម្លាំង និងថាមពលដល់យើងបានច្រើន ហើយយើងមិនគួរណាព្រោះតែរឿងបន្តិចបន្តួចនៅក្នុងការរស់នៅក៏ឆោឡោនៅមិនសុខក្នុងខ្លួនទេ ដែលនាំតែមានការលំបាកដល់ខ្លួនឯងតែប៉ុណ្ណោះ។
ដូចពាក្យចាស់លោកថា ខឹងខុស ខឹងខាត ខឹងនាំប្រមាទ ខឹងបាត់ពិចារណា ខឹងប្រឹងកម្លាំងបាយ ខឹងខ្ជាយស្មារតី …
ដូច្នេះយើងគួរតែប្រកាន់ភ្ជាប់នូវចិត្តគំនិត «៣មិន» និង«៣ត្រូវ» នោះគឺ (១) មិនចេះតែរិះគន់អ្នកដទៃ (២) មិនចេះតែត្អូញត្អែរដាក់អ្នកដទៃ និង (៣) មិនចេះតែបន្ទោសកំហុកដល់អ្នកដទៃ ហើយ (១) ត្រូវចេះលើកទឹកចិត្តខ្លួនឯង និងអ្នកដទៃឲ្យបានច្រើន (២) ទទួលស្គាល់គេឯងឲ្យបានច្រើន និង (៣) ត្រូវលើកសរសើរគេឯងឲ្យបានច្រើន។ ធ្វើដូចនេះយើងនឹងក្លាយជាមនុស្សដែលមានទំនាក់ទំនងល្អក្នុងសង្គម និងអ្នកនៅជុំវិញខ្លួនយើង។ ហើយបើយើងគិតចង់ឲ្យអ្នកដែលនៅជុំវិញខ្លួនយើងក្លាយជាមនុស្សកាន់តែប្រសើរនោះ យើងត្រូវតែសរសើរនៅចំណុចល្អ និងលើកទឹកចិត្តគ្នាឲ្យបានច្រើន។
ប៉ុន្តែប្រសិនបើម្នាក់នោះពិតជាមានចំណុចខ្វះខាតពិតមែនតើយើងត្រូវធ្វើយ៉ាងទៅ? ជាការពិតណាស់ មនុស្សយើងគ្រប់រូបគឺមិនសុទ្ធតែគ្រប់ដប់ទាំងអស់នោះទេ យើងត្រូវយល់អំពីរឿងនេះជាមុនសិន ហើយត្រូវធ្វើឲ្យអ្នកដទៃយល់ផងដែរ។ ហើយក៏មានអ្នកខ្លះនៅពេលដែលផ្តល់គំនិតយោបល់ដល់យើង យើងរីករាយនឹងទទួលយកវា តែលុះដល់យើងឲ្យយោបល់ទៅគេវិញគេក៏ចាប់ផ្តើមខឹងនឹងយើងភ្លាមតែម្តងក៏អាចកើតមានដែរ។
ម្លោះហើយយើងមានវិធីសាស្រ្តឲ្យល្អក្នុងការផ្តល់គំនិតយោបល់ដល់គេ ដូចជាយើងអាចធ្វើយ៉ាងដូចនេះបានដោយជាដំបូងយើងសរសើរគេជាមុនសិនរួចចាំរិះគន់ និងផ្តល់យោបល់ដើម្បីស្ថាបនា ហើយសរសើរគេទៀត… ធ្វើដូចនេះទើបមានភាពប្រសើរក្នុងការប្រាស្រ័យទាក់ទងគ្នា។ បើយើងគិតសព្វៗទៅ នៅពេលដែលយើងគិតតែពីសរសើរអ្នកដទៃជាច្រើនៗក្នុងមួយថ្ងៃៗ ប្រហែលមានមនុស្សមួយចំនួនអាចនឹងគិតថាយើងវៃអែបស៊ីអបក៏ថាបាន។
ប៉ុន្តែការសរសើរ និងការវៃអែបស៊ីអបវាជារឿងពីរផ្សេងគ្នា។ ការសរសើររបស់យើងចំពោះអ្នកដទៃពិតប្រាកដនោះគឺ (១).ដោយស្មោះស (២).ផុសចេញពីចិត្តពិត (៣).ហើយមានការទទួលស្គាល់ពីមហាជន និង (៤).មិនគិតពីផលប្រយោជន៍ផ្ទាល់ខ្លួន។ ផ្ទុយមកវិញ បើយើងសរសើរគេដោយមានគោលបំណងអ្វីមួយខ្លាំងក្លានោះ គេហៅថាវៃអែបស៊ីអបមែនហើយ។ ដូចនេះនៅពេលដែលអ្នកសរសើរអ្នកដទៃត្រូវលើកសរសើរនៅចំពោះមុខឲ្យខ្លាំងៗ ហើយបើចង់រិះគន់គេត្រូវចេះខាំមាត់អប់អណ្តាតកុំក្រលាស់តែផ្តាស់ឲ្យសោះទើបជាការប្រសើរចំពោះខ្លួនយើង និងអ្នកដែលនៅជុំវិញខ្លួនយើង។
បន្ទាប់ពីអានអត្ថបទរបស់ខ្ញុំនេះហើយ ខ្ញុំសង្ឃឹមថា មិត្តអ្នកអានទាំងអស់នឹងយល់កាន់តែច្បាស់ពីការគ្រប់គ្រងអារម្មណ៍របស់ខ្លួន ហើយអាចអនុវត្តទៅតាមវិធាន ៣មិន និង៣ត្រូវ ដើម្បីគ្រប់គ្រងឥទ្ធិពលមិនល្អពីអារម្មណ៍ ដែលជាឧបសគ្គរារាំងដល់ការរីកចម្រើន និងភាពជោគជ័យរបស់អ្នកទាំងអស់បានការតែប្រសើរជាងនេះ។ ប្រសិនបើមានមតិយោបល់ ឬសំណូមពរបន្ថែមអាចទាក់ទងផ្ដល់មតិមកកាន់ខ្ញុំផ្ទាល់ ឬធ្វើការខមិននៅខាងក្រោមអត្ថបទនេះក៏បាន។
