នាយប់មួយបុរសម្នាក់បានមកដល់ផ្ទះវិញយ៉ាងយប់ ទាំងភាពនឿយហត់នឹងការងារផងអារម្មណ៍មួម៉ៅផង ។ ស្រាប់តែនៅពេលនោះ គាត់បានឃើញកូនប្រុសអាយុ៥ឆ្នាំរបស់គាត់កំពុងឈរចាំគាត់នៅឯមាត់ទ្ធារ។
កូនប្រុសតូចនោះបានសួរទៅកាន់ឪពុករបស់ខ្លួនថា៖ «ប៉ាប៉ា! កូនអាចសុំសួរសំណួរប៉ាប៉ាមួយបានដែរឬទេ?»
បុរសនោះក៏ឆ្លើយតបវិញថា៖ «បានតើកូន មានរឿងអ្វីដែរទៅ?»
កូន៖ «តើប៉ាប៉ារកធ្វើការបានលុយប៉ុន្មានក្នុង១ម៉ៅដែរ?»
បុរសនោះអារម្មណ៍មិនសូវល្អផងក៏ឆ្លើយទៅកាន់កូនទាំងដូចខឹងថា៖ »បានប៉ុន្មានគ្មានអីទាក់ទងនឹងកូនទេ! ម៉េចមកសួរប៉ាចឹងកូន?»
កូននៅតែព្យាយាមសួរទៅកាន់ឪពុករបស់ខ្លួន៖ «កូនគ្រាន់តែចង់ដឹងណាប៉ាប៉ា … ប៉ាប៉ា សូមអង្វរណា ប្រាប់កូនបន្តិចមកណា ប៉ាប៉ា…»
បុរសនោះមិនដឹងថាធ្វើយ៉ាងម៉េចក៏ប្រាប់កូនទៅ៖ «ណ្ហើយចុះ! បើកូនចង់ដឹងប៉ាប្រាប់ចុះណា ប្រហែលជា១០០០០រៀលក្នុងមួយម៉ោងណាកូន!!»
កូនតូចនោះស្តាប់ហើយក៏ «អូ!» ដោយឱនក្បាលចុះក្រោម បន្តិចមកក៏ងើយឡើយលើវិញហើយបន្តថា៖ «ចឹងប៉ាប៉ា អាចឲ្យកូន៥០០០រៀលបានអត់ឥឡូវនេះ?»
ឪពុកមានអារម្មណ៍ខឹងខ្លាំងណាស់ក៏ស្តីឲ្យកូនថា៖ «ម៉េចកូនឯងនៅនឹងចេះតែចាំសុំលុយទិញនំញ៉ាំ និងទិញរបស់លេងចឹងទេ! កូនដឹងថាប៉ាមួយថ្ងៃខំធ្វើការទាំងនឿយហត់ដល់យប់ព្រលប់ដើម្បីគ្រួសារនិងកូនលំបាកយ៉ាងណាទេ! បានតើរករឿងសុំលុយឥតប្រយោជន៍ចឹង! ទៅឆាប់ទៅដេកទៅ លឿន!! រកតែឲ្យប៉ាមកផ្ទះវិញទាំងសប្បាយចិត្តតិចមិនបាន!!»
កូនតូចនោះក៏ត្រលប់ទៅគេងទាំងអស់សង្ឃឹម។ បុរសនោះក៏អង្គុយចុះទាំងខឹងខ្លាំង «ចឹងបាននៅសុខៗមកសួរចឹង តាមពិតចង់សុំលុយសោះ យ៉ាប់តែម្តងកូននេះ!»។ មួយសម្ទុះក្រោយមកគាត់ក៏គិតឡើងវិញ គាត់គិតថាកូនប្រហែលជាចង់បានលុយទៅទិញអ្វីមួយខ្លាំងហើយបានលើកនេះដាច់ចិត្តចាំដល់យប់សុំលុយគាត់អញ្ចឹង។ បន្ទាប់មកបុរសនោះក៏សម្រេចចិត្តយកលុយ៥០០០រៀលទៅឲ្យកូនគាត់។
បុរសនោះក៏ចូលទៅដល់បន្ទប់រួចហៅកូនរបស់គាត់៖ «កូនអើយកូន! កូនគេងនៅហ្នឹង?»
កូនគាត់ក៏តប៖ «ប៉ាប៉ា កូនមិនទាន់គេងទេ..»
បុរស៖ «កូន! ឲ្យប៉ាប៉ាសុំទោសផងណាកូន មកពីប៉ាធ្វើការងារពេញ១ថ្ងៃហើយ ហត់ណាស់អារម្មណ៍ក៏មិនសូវល្អ ស្តីឲ្យកូន ឲ្យប៉ាប៉ាសុំទោសផង! នេះ៥០០០រៀលយកទៅទិញនំ និងរបស់លេងទៅណា!!»
កូនតូចនោះពេលដែលបានឮដូច្នោះ ក៏ក្រោកឡើងយ៉ាងលឿន និងទាំងសប្បាយរីករាយថា៖ «ជយោ!! អរគុណប៉ាប៉ា!!» រួចមកកូននោះក៏ទៅយកលុយដែលខ្លួនសន្សំទុកមក មើលទៅមានក្រដាសរាយជាច្រើនហើយឡើងរួញៗអស់ហើយ។ បុរសនោះឃើញកូនមានលុយច្រើនហើយនៅតែសុំទៀតនោះ ក៏ចាប់ផ្តើមចង់ខឹងនឹងកូននោះទៀតហើយ! កូនតូចនោះរាប់លុយទាំងអស់ដែលមានក្នុងដៃ រួចមើលទៅកាន់ឪពុករបស់ខ្លួនទាំងស្នាមញញឹម។
បុរសនោះក៏សួរទៅកូនគាត់ថា៖ «កូនឯងមានលុយច្រើនហើយ នៅសុំប៉ាធ្វើអីទៀតកូន?»
កូនក៏ឆ្លើយ៖ «ព្រោះថាលុយកូនមិនទាន់គ្រប់នឹងណាប៉ា!»
បុរសនោះក៏បន្តសួរទៀត៖ «ចឹងឥឡូវគ្រប់ហើយ កូនចង់ទៅទិញអីដែរ?»
កូនក៏ឆ្លើយ៖ «ប៉ាប៉ា! នេះលុយ១០០០០រៀលឲ្យប៉ាណា កូនចង់ទិញពេលវេលារបស់ប៉ាប៉ា១ម៉ោងណា! ចឹងថ្ងៃស្អែកកុំភ្លេចចេញពីធ្វើការល្ងាចឡើងឆាប់ត្រលប់មកផ្ទះញ៉ាំបាយជាមួយកូនណាប៉ាប៉ា!!»
