ប៉ុន្មានថ្ងៃកន្លងមកនេះ អាកាសធាតុក្តៅជាប់មករហូត ធ្វើឲ្យយើងរាល់គ្នាឆាប់ស្រេកទឹក និងចេះតែចង់ផឹកភេសជ្ជៈ ត្រជាក់ៗ ។ នាថ្ងៃត្រង់នៃថ្ងៃមួយនោះ ពូសំកំពុងតែពិសាបាយថ្ងៃត្រង់នៅផ្ទះជាមួយប្រពន្ធ និងកូនរបស់គាត់ ។ ពេលពិសាបាយបានពាក់កណ្តាលពីសំស្រេកទឹកណាស់ ប៉ុន្តែផឹកទឹកច្រើនក៏នៅតែមិនបាត់ ពេលនោះគាត់ក៏ចង់ផឹកស្រាបៀរត្រជាក់ដែលបានទុកក្នុងទូទឹកកកនៅផ្ទះបាយ ប៉ុន្តែគាត់មិនហ៊ាន ព្រោះប្រពន្ធគាត់មិនចង់ឲ្យគាត់ផឹកទេនៅពេលនោះ ។
មួយយូរដែរ ទើបគាត់ហ៊ានសុំប្រពន្ធគាត់ផឹក៖ «អូន! ថ្ងៃនេះក្តៅខ្លាំងណាស់ណា តើអាចឲ្យបងផឹកប៊ីយែរ១កំប៉ុងបានអត់អូន?» ។
ប្រពន្ធពូសំ៖ «មិនដឹងផឹកអីទេថ្ងៃថ្មារនេះនោះ?…» ។
កូនពូសំក៏ជួយនិយាយ៖ «មែនហ្នឹងម៉ាក់ ថ្ងៃនេះក្តៅណាស់ឲ្យប៉ាគាត់ផឹកប៉ុន្មានកំប៉ុងទៅណា… គាត់មិនអាចទ្រាំបានទេ…» ។
ប្រពន្ធពូសំ៖ «អញ្ចឹងមិនអីទេ ចាំអូនទៅផ្ទះបាយយកឲ្យបង…» ។
(ប្រពន្ធពូសំក៏ដើរទៅផ្ទះបាយយកស្រាបៀរ…)
ពូសំ៖ «កូន! ម៉េចថ្ងៃនេះចំណែកម្ល៉េះ? កូនជួយនិយាយឲ្យប៉ាផង…គួរឲ្យស្រលាញ់ណាស់!»
កូនពូសំ៖ «មិនអីទេប៉ា! រឿងតិចតួចទេ ព្រោះព្រឹកមិញនេះ ម៉ាក់គាត់បានសន្យាថាប្រាក់កម្រៃបានមកពីការលក់កំប៉ុនអេតចាយស្រាបៀរប៉ាផឹកនេះឲ្យកូនយកទៅទុកទិញនំញ៉ាំទាំងអស់ណាប៉ា!!» ៕
