នាព្រឹកព្រលឹមស្រាងៗ មានបុរសម្នាក់ដើរយ៉ាងហេវហត់នៅលើស្ពានមួយដ៏ស្ងាត់ និងមើលមិនសូវឃើញ ។ ស្រាប់តែមានបុរសម្នាក់ទៀតមាឌធំដំបង លោតចេញមករាំងផ្លូវពីមុខ ដៃកាន់កាំបិតភ្ជង់ទៅបុរសនោះហើយនិយាយថា៖ «នៅឲ្យស្ងៀម ហើយយកលុយទាំងអស់ចេញមកឲ្យយើងទាំងអស់! យើងជាចោរប្លន់ណា!!» ។ ហើយបុរសនោះក៏លើកដៃទាំងពីរឡើងសំដៅទៅចោរនោះហើយនិយាយថា៖ «ចូលមក!» ។ ចោរនោះក៏ចូលទៅជិតបុរសនោះ ហើយឆែកសព្វខ្លួនប្រាណគាត់អស់ហើយពុំឃើញមានប្រាក់កាក់លុយ ឬវត្ថុមានតម្លៃអ្វីក្នុងខ្លួនគាត់បន្តិចណាទាល់តែសោះ។ បន្ទាប់មកដោយហេតុតែរកពុំបានអ្វីសោះពីបុរសនោះ ចោរនោះក៏ដើរចេញពីបុរសនោះតែម្តង ប៉ុន្តែក្នុងពេលនោះភ្លាមតែម្តង ស្រាប់តែបុរសនោះគាត់ចាប់តោងដៃចោរនោះឡើងជាប់មិនឲ្យទៅណាហើយក៏និយាយថា៖ «កុំទៅណា! មិញក្រែងថាចង់ចាក់ខ្ញុំឲ្យស្លាប់អី? ចាក់មក! ចាក់ឲ្យខ្ញុំស្លាប់ភ្លាមតែម្តងទៅ!! លឿនឡើងខ្ញុំមិនចង់រស់នៅលើលោកនេះទៀតទេ!! ព្រោះខ្ញុំឥឡូវនេះក្ររហាមខ្លាំងណាស់រកបាយស៊ីមិនបានទេ ស្លាប់ទៅវាល្អជាជាង!!» ។ ដោយហេតុតែបុរសតោងចោរនោះជាប់ពេករកទៅណាពុំរួច ចោរនោះក៏ដកលុយក្នុងខ្លួនដែលមានមួយចំនួនឲ្យគាត់ទៅបាយហូបតែម្តងទៅ។ តាមពិតបុរសនោះមកលើស្ពាននេះចង់លោតទឹកសម្លាប់ខ្លួនទេ ប៉ុន្តែក៏បានជួបចោរនោះ ហើយចោរប្លន់មិនបានសម្រេចឃើញបុរសនោះគួរឲ្យអាណិតជាងខ្លួនក៏ឲ្យលុយទៅបុរសវិញទៅ ៕
