មានបុរសម្នាក់ ដែលគាត់បានធ្វើការពេញមួយជីវិតរបស់គាត់ហើយ លុយរបស់គាត់ដែលបានមកគឺសន្សំទុកទាំងអស់។ គាត់គឺជាមនុស្សកំណាញ់ម៉ៅស្វិតខ្លាំងណាស់ ពិសេសចំពោះរឿងលុយ គឺគាត់មិនដែលឲ្យលុយរបស់គាត់របេះចេញសូម្បីតែមួយរៀលលុយខ្មែរក៏ដោយ។ គាត់ស្រលាញ់លុយជាងអ្វីៗទាំងអស់ ហើយមុនពេលដែលគាត់ស្លាប់នោះ គាត់បានប្រាប់ប្រពន្ធរបស់គាត់ថា៖ «ឥឡូវសូមអូនស្តាប់បង ពេលដែលបងស្លាប់បាត់ទៅបងចង់ឲ្យអូនយកលុយរបស់បងទាំងអស់ដាក់ក្នុងមឈូសទៅជាមួយបង បងចង់យកលុយរបស់បងទៅប្រើឲ្យជាតិក្រោយទៀត»។ ហើយគាត់ក៏ឲ្យប្រពន្ធគាត់សន្យាជាមួយគាត់។
នៅថ្ងៃមួយនោះក៏មកដល់ គាត់ក៏បានស្លាប់បាត់ទៅ ប្រពន្ធរបស់គាត់ក៏បានរៀបចំពិធីបុណ្យជូនគាត់។ ពេលពិធីបុណ្យនោះចប់ អាចារ្យរៀបចំបិទមឈូស ប៉ុន្តែប្រពន្ធគាត់ប្រាប់ថា៖ «ចាំមួយភ្លែត ខ្ញុំបានសន្យាជាមួយគាត់ថា ខ្ញុំនឹងដាក់លុយរបស់គាត់ទាំងអស់ទៅជាមួយគាត់ ខ្ញុំមិនអាចកុហកគាត់បានទេ» ។ អាចារ្យក៏សួរថា៖ «តើពិតជាត្រូវដាក់លុយទាំងអស់ទៅជាមួយគាត់មែនទេ?» ប្រពន្ធក៏ឆ្លើយថា៖ «ខ្ញុំបានតម្កល់លុយទាំងនោះនៅក្នុងគណនេយ្យខ្ញុំនៅធនាគាររួចហើយ ខ្ញុំបានសរសេរមូលប្បទានបណ្ណ (ហ្សែក) ដាក់ឲ្យគាត់ជំនួសវិញ» ។
